Ndërtimi për rrugën Berat – Ballaban në lotin e 3-të është në nivelin e 34 përqind të realizmit. Ky segment rrugor ka një gjatësi prej 16 kilometrash.
Në të gjithë gjatësinë e lotit numër 3 është hapur traseja dhe po vijon puna me ndërtimin e veprave të artit. Punohet gjithashtu edhe për mbrojtjen e skarpateve dhe mureve mbajtëse.
Ministria e Infrastrukturës Belinda Balluku ka inspektuar punimet e deritashme ku ka theksuar se ndërtimi i këtij aksi rrit edhe mundësinë e zhvillimit te turizmit.
“Kjo do jetë një rrugë shumë e rëndësishme për zhvillimin bujqësor dhe atë turistik. Është një krahinë e jashtëzakonshme përsa i përket bukurive natyrore dhe duhet pasur parasysh që rruga Berat-Ballaban kalon përmes Beratit, Skraparit, Përmetit dhe Tepelenës, kështu që prekim dhe rajone të rëndësishme si të zhvillimit bujqësor ashtu dhe të zhvillimit turistik”, tha Balluku.
Përmirësimi i këtij aksi shkurton kohën dhe distancën e udhëtimit automobilistik ndërmjet bashkive Përmet, Tepelenë, Memaliaj dhe Gjirokastër me bashkinë Berat, ndërsa pritet të krijojë akses më të afërt edhe me shtetin fqinj Greqinë, nëpërmjet pikës doganore “Tre Urat”.
/rtsh.al/
