Gazetari Romir Saraçi ka deklaruar në studion e emisionit “3D” të Alban Dudushit në RTSH1 se deklarata e kryeministrit Edi Rama mbi “Vorio Epirin” është e rrezikshme.
Saraçi theksoi se Greqia ka qenë e qartë në kërkesat e saj ndryshe nga sjellja e shtetit shqiptar.
Sipas Saraçit, hapja e tezës së “Vorio Epirit” nuk duhet parë në aspektin patriotik, “por duhet parë në krahun e kundërt sepse nuk ekziston sot debati për “Vorio Epirin”.
“Kjo politikë emocionale e kryeministrit e nxjerr të dobët shtetin shqiptar përballë palës greke. Greqia ka qenë e qartë dhe e prerë në kërkesat e saj vitet e fundit. Ka qenë serioze dhe korrekte në atë që kërkon, ndryshe nga sjellja e shtetit shqiptar. Ndërkohë kryeministri shqiptar shkon në Greqi dhe hap tezën e “Vorio Epirit”. Mua më duket e rrezikshme deklarata që bëri kryeministrit. Nuk duhet parë në aspektin patriotik, por duhet parë në krahun e kundërt sepse nuk ekziston sot debati për “Vorio Epirin”, u shpreh Saraçi.
Nga ana tij, analisti Aleksandër Çipa theksoi se kryeministri Rama nuk hapi tezën për “Vorio Epirin”, por se për të flasin rrymat ekstremiste.
“Nuk e hapi! Ekstremistët e provokuan! Një kryeministër i një vendi që shkon në një vend tjetër dhe thotë; “Më kërcënuan”, ky është një sulm shumë i rëndë për sigurinë sepse dolën një grup ekstremist me parulla, dhe kryeministri mori edhe mesazhe kërcënimi. Madje mediat më serioze në Greqi këtë term e kanë zyrtarizuar. Madje ka ministra që e përmendin këtë”, tha Çipa.
/rtsh.al/
