Prokuroria e Parisit ka kërkuar dënimin me pesë vjet burg dhe pesë vjet ndalim nga posti publik për lideren e ekstremit të djathtë Marine Le Pen, në një gjyq në të cilin ajo dhe 24 persona të tjerë akuzohen për përvetësim të fondeve të Bashkimit Evropian.
Gjyqi, i cili vjen pothuajse një dekadë pas fillimit të hetimeve fillestare, duket se vë në rrezik përpjekjet e partisë së saj Rally Kombëtare (RN) për të lustruar imazhin përpara zgjedhjeve presidenciale të vitit 2027.
Të mërkurën, prokurori i Parisit kërkoi një gjobë prej 300 mijë euro dhe 5 vite burg për Marine Le Pen, me ekzekutim të përkohshëm. Nëse gjykata e shpall fajtore për akuzat me këtë ekzekutim të përkohshëm, Le Pen nuk do të jetë në gjendje të kandidojë në zgjedhje edhe nëse ajo apelon kundër vendimit.
Le Pen, vetë partia RN dhe 24 zyrtarë (punonjës, ish-deputetë dhe asistentë parlamentar) janë akuzuar të gjithë se kanë përdorur paratë e Parlamentit Evropian për të paguar stafin në Francë që punonte për partinë e tyre, e cila në atë kohë quhej Balli Kombëtar.
RN, si partitë e tjera të së djathtës ekstreme në Evropë, po ecën lart pas një performance të fortë në zgjedhjet evropiane në qershor.
Duke iu drejtuar gjyqit muajin e kaluar, Le Pen tha se ajo ishte e pafajshme.
"Unë nuk kam absolutisht asnjë ndjenjë që kam kryer parregullsinë më të vogël, apo veprimin më të vogël të paligjshëm," i tha ajo gjykatës.
/rtsh.al/
