Ambasadori i Moskës në OKB, Genadi Gatilov ka deklaruar se Rusia është e hapur për negociata që çojnë në përfundimin e luftës në Ukrainë, nëse iniciohen nga presidenti i sapozgjedhur i SHBA-së, Donald Trump.
Sipas ambasadorit rus, çdo negociatë duhet të bazohet në realitetet e përparimeve ruse. Trump ka kritikuar vazhdimisht shkallën e ndihmës perëndimore për Kievin dhe ka premtuar t'i japë fund konfliktit me shpejtësi, pa shpjeguar se si.
Fitorja e tij në zgjedhjet presidenciale të 5 nëntorit ka nxitur shqetësime në Kiev dhe kryeqytete të tjera evropiane për shkallën e angazhimit të ardhshëm të SHBA-së për të ndihmuar Ukrainën.
“Trump premtoi të zgjidhë krizën ukrainase brenda natës. Në rregull, le të përpiqet. Por ne jemi njerëz realistë, sigurisht e kuptojmë se kjo nuk do të ndodhë kurrë. Por nëse ai fillon apo sugjeron diçka për të nisur procesin politik, është i mirëseardhur”, tha para gazetarëve në Gjenevë Genadi Gatilov, ambasadori rus në Kombet e Bashkuara.
Galitov tha se çdo negociatë duhet të bazohet në atë që ai i quajti "realitetet në terren. Forcat ruse po përparojnë me ritmin më të shpejtë në të paktën një vit në Ukrainë dhe tani kontrollojnë rreth një të pestën e vendit. Presidenti ukrainas Volodymyr Zelensky ka thënë në mënyrë të përsëritur se paqja nuk mund të vendoset derisa të gjitha forcat ruse të dëbohen dhe i gjithë territori i pushtuar nga Moska, përfshirë Krimenë, t’i kthehet Ukrainës.
Zelensky u tha liderëve evropianë në Budapest javën e kaluar se lëshimet ndaj Rusisë do të ishin “të papranueshme për Ukrainën dhe vetëvrasëse për të gjithë Evropën”.
Pushtimi rus i Ukrainës në vitin 2022 shkaktoi konfrontimin më të madh midis Moskës dhe Perëndimit që nga thellësitë e Luftës së Ftohtë, duke nxitur përpjekjet për të izoluar Rusinë.
Gatilov tregoi se zgjedhja e Trump përfaqësonte një mundësi të re për dialogun me Shtetet e Bashkuara, por ishte e dyshimtë për një rivendosje më të gjerë të marrëdhënieve, duke i bërë jehonë kujdesit të mëparshëm të shprehur nga Kremlini.
“Elita politike e SHBA-së, pavarësisht nga ndryshimet politike të brendshme, (Uashingtoni) vazhdimisht ndjek një qëndrim të frenimit të Moskës dhe ky orientim është i rrënjosur thellë për fat të keq dhe ndryshimi i administratës bën pak për ta ndryshuar atë. I vetmi ndryshim (që) mund të jetë i mundur është dialogu midis vendeve tona, diçka që ka munguar gjatë disa viteve të fundit”, shtoi ai.
/rtsh.al/
