Opozita po përballet me një situatë jo të lehtë para zgjedhjeve të vitit 2025, teksa dy liderët kryesorë të saj, Sali Berisha dhe Ilir Meta ndodhen nën masa sigurie, kreu i PL-së në arrest me burg, ndërsa kreu i PD-së në arrest shtëpie.
Megjithatë, Sekretari i Përgjithshëm i PL-së, Tedi Blushi thotë se ata kanë ndezur motorët për zgjedhjet e vitit të ardhshëm, duke shpresuar në fitore.
Në studion e emisionit “Ekspres” në RTSH, Blushi tha se Meta, edhe pse në qeli, vijon të drejtojë partinë dhe se ka komunikime të vazhdueshme me strukturat e partisë.
“Situata nuk është e lehtë. PL ndodhet në një agresion dhe terror të pashembullt nga narko-regjimi i Edi Ramës. Strukturat janë në këmbë, e gjithë partia është në gjendje lufte me këtë regjim. Kemi ndezur edhe motorët për të arritur atë fitore spektakolare që shqiptarët presin në zgjedhjet e 2025. Presidenti i PL është Ilir Meta i cili vazhdon ta drejtojë partinë edhe pse në një masë ekstreme izolimi. Komunikimi me të është i përditshëm dhe besoj që do dalim edhe më të fortë nga kjo betejë”, the Blushi.
I pyetur mbi rikthimin e deputetëve demokratë në Kuvend, Blushi tha se opozita ka nxjerrë mësime nga braktisja e institucioneve dhe se tashmë aksioni do të jetë i kombinuar.
Ndërkohë, teksa Partia Demokratike insiston në krijimin e një qeverie teknike para zgjedhjeve, Blushi thekson se PL do të hyjë në këtë garë elektorale në çfarëdo rrethane.
“Opozita i ka nxjerrë mësimet nga gabimet e të kaluarës që kanë qenë bojkoti i institucioneve dhe djegia e mandateve. Aksioni do të jetë i kombinuar, do ndërthuret aksioni politik në terren me betejën institucionale në Parlament. Protesta e 29 tetorit tregoi që e gjithë Shqipëria ishte në këmbë dhe për 3-4 orë i gjithë vendi ishte në duart e opozitës. Ne do të hymë në zgjedhje në çfarëdo rrethane edhe pse do të jetë një proces elektoral i vështirë sa kohë që dy drejtuesit kryesorë të opozitës sot janë në burg apo të ndaluar me masë ekstreme ndalimi politik. Përballja nuk është e lehtë, por na motivon për të intensifikuar lëvizjet tona politike”, deklaroi Blushi.
/rtsh.al/
