Policia belge është vendosur në kërkim të personave të armatosur pasi raportimit të shtënave jashtë një stacioni metroje në qendër të Brukselit.
Pamjet e kamerave të sigurisë të transmetuara nga mediat lokale tregojnë 2 persona të veshur me kapuç dhe me armë në hyrje të stacionit Clémenceau në kryeqytetin belg herët të mërkurën.
Sarah Frederickx, zëdhënëse e policisë së Brukselit tha se të dyshuarit ikën në stacionin e metrosë dhe mund të jenë ende në tunelet e metrosë.
Zëdhënësja tha se nuk ka të lënduar nga të shtënat. Si policia lokale ashtu edhe policia federale hekurudhore po kontrollojnë zonën.
Policia po kërkon “një grup të vogël njerëzish, ndoshta dy ose tre individë”, tha zonja Frederickx, duke shtuar se ata mund të jenë ende të armatosur dhe se policia nuk donte të rrezikonte.
Stacioni Clémenceau është mbyllur, si dhe stacioni aty pranë Bruksel-Midi, i cili shërben gjithashtu si terminal për trenat e Eurostar. Gjithashtu, dy linja metroje përmes qendrës së Brukselit janë pezulluar nga Gare de l'Ouest në Trône, që është afër Parlamentit Evropian.
Raportet në mediat belge sugjerojnë se ngjarjet mund të kenë qenë të lidhura me trafikun e drogës. Zona përreth Bruksel-Midi ka pasur prej kohësh një reputacion për dhunë dhe krim.
Linjat e tramvajit janë ndërprerë, përkatësisht midis Lemonnier dhe Berkendael dhe midis stacioneve Port d'Anderlecht dhe Gare du Midi.
Mijëra udhëtarë janë prekur nga incidenti, i cili ndodhi gjatë orës së pikut të mëngjesit. Nuk ka asnjë tregues se kur mund të rifillojë shërbimi normal.
Një post komandimi për të koordinuar kërkimin është ngritur në bashkinë e Anderlecht, në perëndim të qendrës së qytetit të kryeqytetit belg.
/rtsh.al/
