Kremlini ka reaguar ndaj deklaratave të presidentit ukrainas Volodymyr Zelensky se ai ishte i gatshëm për bisedime të drejtpërdrejta me homologun e tij rus Vladimir Putin.
Moska e ka cilësuar qëndrimin e Zelensky-it si fjalë boshe teksa ka përpjekje për negociata mbi konfliktin gati tre-vjeçar.
“Këto nuk janë gjë tjetër veçse fjalë boshe”, u tha gazetarëve zëdhënësi i Kremlinit Dmitry Peskov.
Putin javën e kaluar tha se Moska do të zhvillonte bisedime me Ukrainën, por përjashtoi mundësinë që të fliste drejtpërdrejt me Zelensky.
Një dekret i nënshkruar nga Zelensky në vitin 2022 përjashton bisedimet e drejtpërdrejta me Putinin – diçka që Peskov vuri në dukje të mërkurën dhe që Moska e thekson rregullisht kur pyetet nëse është gati për bisedime me Kievin.
Zëdhënësi i Kremlinit përsëriti gjithashtu pretendimin e shpeshtë të Rusisë se Zelensky nuk është një president legjitim, pasi mandati i tij pesëvjeçar në detyrë skadoi vitin e kaluar.
"Zelensky ka probleme të mëdha de jure (legalisht) në Ukrainë. Por edhe përkundër kësaj ne mbetemi gati për bisedime," tha Peskov.
Zelensky i tha se do të ishte gati për bisedime me Putinin, duke përfshirë "katër pjesëmarrës", pasi intervistuesi ngriti mundësinë e bisedimeve midis Rusisë, Ukrainës, BE-së dhe SHBA-së.
Zëdhënësi i Kremlinit tha se "realiteti në terren thotë se Kievi duhet të jetë i pari që do të tregojë hapje dhe interes në bisedime të tilla", me sa duket duke iu referuar përparimeve të fundit ushtarake ruse.
Zelensky tha gjithashtu se Putini "do ta kuptojë nevojën për t'i dhënë fund kësaj lufte vetëm nëse i jepet një ultimatum i qartë" nga Shtetet e Bashkuara dhe se "fuqia për të formësuar atë paqe varet nga presidenti Trump".
/rtsh.al/
