Edhe përgjatë muajit Mars do të ofrohet analiza e mamografisë falas pranë Poliklinikës së Korçës. Kjo nismë e Ministrisë së Shëndetësisë dhe Mbrojtjes Sociale synon zbulimin e hershëm të kancerit të gjirit dhe parandalimin e tij. Nada Nasto, Shefe e Kujdesit Shëndetësor Parësor Korçë thotë se nga viti në vit, vihet re një rritje e ndërgjegjësimit për kryerjen e mamografisë, ndërkohë thekson faktin se gjatë muajit tetor i cilësuar si tetori rozë, u kryen 1067 mamografi.
“Në bazë të urdhrit të ministrisë së Shëndetësisë gjatë muajit mars mamografia në poliklinikën e spitalit rajonal Korçë, do të jetë e hapur me një orar të zgjatur me vetëm kartën e identitetit”, u shpreh Nada Tërpo, Shefe e Kujdesit Shëndetësor Parësor.
Kanceri i gjirit renditet si shkaktari i parë e vdekjeve tek femrat ndaj është e rëndësishme parandalimi por dhe kurimi pasi nëse kjo sëmundje kapet në stadin e parë, është e shërueshme.
Kontrollet periodike shpëtojnë jetë, ndaj apeli që vjen për të gjitha gratë e vajzat është që të mos e lenë pas dore shëndetin e tyre.
Gazetare: Geralda Manushi
/rtsh.al/
