Mbi 150 qenë të racave të ndryshme pothuajse nga e gjithë Evropa dhe vendet e rajonit kanë marrë pjesë në konkursin ndërkombëtare të bukurisë të mbajtur për të pestën herë më radhë në Prizren nga Federata Kinologjike e Kosovës. Konkursi prej vitit 2014 mbahet edhe në qytete të tjera të Kosovës shprehet Saud Kajtazi Kryetar i Federatës Kinologjike të Kosovës.
“Dy manifestime kinologjike ndërkombëtare dhe një kombëtare dhe kemi pjesëmarrës pothuajse nga të gjitha shtetet evropiane”, u shpreh Saud Kajtazi Kryetar i Federatës Kinologjike të Kosovës.
Konkursi ka për qëllim të transmetojë mesazhe për kujdesin ndaj kafshëve dhe mirëmbajtjen e tyre.
“Së pari është ruajtja e shëndetit të qenve dhe të tregohet një kulturë se si duhet të mbahen ato”, u shpreh Kajtazi.
Konkursi dhe parada bëri bashkë dhjetëra trajnerë nga vende të ndryshme të botës të cilët u përfaqësuan me qenë të racave të ndryshme ndërsa u vu re mungesa e qenve konkurrues nga Shqipëria.
“Vite të tjera kemi pasur pjesëmarrës nga Shqipëria dhe kryesisht me raca autoktone”, u shpreh Saud Kajtazi.
Gara e bukurisë për qentë zgjati dy ditë dhe fituesit u vlerësohen me çmimet përkatëse. Konkurse të njëjta mbahen edhe në qytetet më të rëndësishme të Evropës e në Shqipëri.
/rtsh.al/
