Mundësi shqiptar Islam Dudaev i ka dhuruar një tjetër medalje historike vendit në Lojërat Olimpike të Parisit.
29-vjeçari mundi numrin një të botës në peshën 65 kg, Iszmail Muszukajev, në stil të lirë.
"Islam Dudaev i dhuron Shqipërisë medaljen e dytë olimpike me një ndeshje fantastike. Faleminderit kampion!" shkroi presidenti Bajram Begaj në rrjetet sociale.
Kryeministri Edi Rama gjithashtu falënderoi sportistin shqiptar që e bëri gjithë popullin të gëzojë.
"JA EDHE MEDALJA E DYTË OLIMPIKE NË HISTORINË TONË💥🥉🦅❤️🇦🇱. Kush di të gëzohet le të gëzohet me shumicën dërrmuese të shqiptarëve😍👐🏿😍. Kujt nuk di të gëzohet le t’ia njohim meritën e hudhrës që ia mban larg Shqipërisë syrin e keq🧄🤩," reagoi ai në faqen e tij në Facebook.
Për medaljen e dytë olimpike, kryeparlamentarja Elisa Spiropali tha: "Mundësi i skuadrës sonë olimpike Dudaev, do të na sjellë prej “Paris 2024” një tjetër gur të çmuar në gjerdanin e sportit tonë, të Shqipërisë sonë. Mirënjohje kampionit Islam Dudaev!”
Kryetari i Partisë Demokratike Sali Berisha, e uroi Dudaevin për suksesin që arriti ai dhe mundësi tjetër dje, Valiev.
"Një urim të përzemërt mundësit Ismail Dudaev për suksesin e shkëlqyer që arriti pas atij që arriti dje mundësi tjetër Valiev. Mirënjohje dhe përgëzime për të dy dhe trajnerit të tyre për këtë rezultat shumë të veçantë!"
Kryebashkiaku i Tiranës, Erion Veliaj, ka përcjellë emocionet nga Parisi përmes një fotoje "shqiponjash" me kampionin shqiptar.
"Edhe Islam Dudaev i bronztë! Prapë medalje historike për Sport Klub Tiranën 🤍💙 dhe Shqipërinë në Lojërat Olimpike Paris 2024! 🇦🇱🇫🇷
Fantastikeeee! Forcaaaa!" shkroi z. Veliaj në Facebook.
Të shtunën ishte mundësi tjetër shqiptar, Chermen Valiev, që shkroi historinë në Paris 2024.
Mundësi kuqezi i dhuroi Shqipërisë medaljen e parë të bronztë në historinë e Lojërave Olimpike. Ai mposhti me rezultatin 6–2 në finalen për medaljen e bronztë Viktor Rassadin nga Taxhikistani në stilin e lirë në mundje në peshën deri në 74 kg.
Garat u transmetuan drejtpërdrejt dhe ekskluzivisht në Radiotelevizionin Shqiptar.
/rtsh.al/
