Policia e Elbasanit bëri të ditur se dy të paraburgosur, të cilët akuzoheshin për veprën penale “Vjedhje”, kanë mundur të arratisen nga komisariati i Policisë së Elbasanit.
Për tu arratisur ata kanë shfrytëzuar momentin kur po transportoheshin drejt burgut, pas masës së sigurisë së dhënë nga Gjykata e Elbasanit.
Është ende e paqartë se si dy të paraburgosurit i kanë shpëtuar syrit të policisë dhe kanë mundur të ikin me vrap nga brenda ambienteve të komisariatit të policisë.
Pas dhënies së alarmit për arratisjen kanë nisur edhe kërkimet intensive të policisë, të cilat kanë çuar në kapjen e njërit prej të arratisurve, ndërkohë që vazhdojnë kërkimet për të arratisurin e dytë.
“Mesditën e sotme, shtetasit , pas masës së sigurisë në Gjykatën e Elbasanit, të ndaluar më datë 28.12.2024, për veprën penale "Vjedhja", pasi i kanë zbritur nga automjeti shërbimet e Policisë me qëllim kryerjen e procedurave për transferim në IEVP, këta shtetas kanë mundur të largohen me vrap nga ambientet e DVP Elbasan. Si rezultat i veprimeve policore është bërë e mundur kapja e njërit prej tyre, shtetasit E. P., dhe vijon puna për kapjen e shtetasit tjetër, N. L.”, njofton policia.
Në lidhje me këtë rast, Drejtoria e Standardeve Profesionale në Drejtorinë e Përgjithshme të Policisë së Shtetit ka nisur hetimin disiplinor ndaj punonjësve të Policisë dhe Agjencia e Mbikëqyrjes Policore ka nisur hetimin penal.
/rtsh.al/
