Bisedimet për të formuar koalicionin e parë të qeverisë së Austrisë, të udhëhequr nga Partia e Lirisë (FPO) e ekstremit të djathtë me Partinë Popullore Konservatore (OVP) kanë dështuar.
Negociatat midis FPO dhe partisë popullore OVP vazhdonin prej disa javësh, por u bllokuan për shkak të mosmarrëveshjeve mbi ndarjen e dikastereve.
"Kreu i FPO, Herbert Kickl informoi presidentin Alexander Van der Bellen se bisedimet e koalicionit me OVP-në kanë dështuar," tha FPO në një deklaratë pasi Kickl u takua me Van der Bellen në zyrën e presidentit.
FPO doli e para në zgjedhjet parlamentare të shtatorit me rreth 29%. OVP ishte i vetmi partner i saj i mundshëm i koalicionit.
Tani Austria ndodhet në një situatë të madhe pasigurie politike. Nuk përjashtohen opsione sikurse zgjedhje të parakohshme, të cilat nuk mund të mbahen më shpejt se në rreth tre muaj.
/rtsh.al/
