Forcat e Posaçme "Shqiponja", pas shkëmbimit të informacionit me Interpol Tirana dhe Interpol Romën, kanë kapur dhe arrestuar 54-vjeçarin A.Sh., i shpallur në kërkim ndërkombëtar. Arrestimi u realizua në fshatin Stom Golem, ndërsa shtetasi ishte shpallur në kërkim nga autoritetet italiane për veprën penale “Trafikimi i narkotikëve”.
A.Sh., banues në fshatin Hot i Ri, ishte i kërkuar nga Interpol Roma pasi Prokurori Publik në Torino, në janar të vitit 2024, kishte vendosur masën e sigurisë “Arrest në burg” për të. Aktualisht, Interpol Tirana dhe Interpol Roma po kryejnë procedurat për ekstradimin e tij në Itali, për t’u gjykuar për akuzat që rëndojnë mbi të.
Ky arrestim është pjesë e një operacioni më të gjerë, i cili synon lokalizimin dhe kapjen e shtetasve që janë shpallur në kërkim ndërkombëtar për krime të ndryshme, përfshirë trafikimin e narkotikëve.
/rtsh.al/
