47 kamera sigurie janë hequr nga policia në qarkun e Durrësit, të cilat ishin vendosur në shtyllat elektrike dhe ndërtesa nga grupet kriminale për të monitoruar lëvizjet në disa nga zonat kyçe të qytetit. Aksioni është shtrirë në Durrës, Shijak, Nikël dhe Krujë, dhe vijon si pjesë e operacionit të koduar “Fijet” që deri më tani është zhvilluar në Shkodër dhe Vlorë.
Nën hetim për vendosjen e këtyre kamerave janë 8 persona, dy në Durrës ku nën hetim është Plarent Dervishi i shpallur në kërkim për atentatin ndaj ish-prokurorit Arjan Ndoja, dhe Dejvid Karaboja. Ndërsa në Shijak janë në hetim 6 persona, ku kamerat ishin vendosur nga grupi Avdyli.
Vijon puna për identifikimin e personave përgjegjës për vendosjen e kamerave të sigurisë në kundërshtim me ligjin në Nikël dhe Krujë.
Këto kamera janë vendosur nga grupet kriminale me qëllim sigurimin e informacioneve, për qëllime kriminale, si dhe për të monitoruar lëvizjet e policisë.
Kontretisht në Durrës janë hequr 11 kamera në lagjet nr. 6 dhe nr. 17 dhe nën hetim janë Dejvid Karaboja dhe Plarent Dervishi.
Në Shijak janë hequr 18 kamera të vendosura në lagjen e “Keçeve” dhe në lagjet “Popullore”, “Kodër Sukth” dhe “Partizani”. Nën hetim janë 6 persona, Albert Muharremi vëllai “Rrumit të Shijakut” , Xhulio Vora, Astrit Balliu ( Avdyli), Jasin Kala ( Avduli ), Altin Avdyli dhe Sajmir Gjepali.
Në Krujë dhe në Nikël janë çmontuar 18 kamera të tjera, të vendosura në shtyllat elektrike të disa lagjeve dhe vijon puna hetimore për identifikimin dhe procedimin penal të personave që kanë vendosur në mënyrë të kundërligjshme, këto kamera.
Më herët ky aksion u shtri në Shkodër ku u hoqën 38 kamera sigurie në 3 lagje dhe në Vlorë u çmontuan 16 kamera që ishin instaluar në lagjet “Uji i Ftohtë”, “1 Maji”, “24 Maji”, “Lirim” dhe “Hajro Çakërri” .
/rtsh.al/
