Mësuesi nga Tepelena, i dhunuar dy ditë më parë nga disa persona, është ndaluar këtë të mërkurë, pasi akuzohet se ka ngacmuar seksualisht dy nxënëse. Policia sqaron se 59-vjeçari K.L., është dhunuar nga disa persona, një prej të cilëve, 29-vjeçari A.G., është ndaluar nga policia, ndërsa vijon puna për identifikimin dhe kapjen e bashkëpunëtorëve të tij. Në dëshminë e dhënë për media, mësuesi u shpreh se nuk i njihte personat që e dhunuan, dhe se ai ishte futur në automjetin e tyre pasi e kishin ftuar për të konsumuar një kafe.
“Specialistët e Seksionit për Hetimin e Krimeve të Komisariatit të Policisë Tepelenë, në përfundim të veprimeve hetimore të kryera nën drejtimin e Prokurorisë pranë Gjykatës së Rrethit Gjyqësor Gjirokastër, për ngjarjen e ndodhur në datën 16.01.2023, në vendin e quajtur “Zona industriale”, Tepelenë, ku disa shtetas kanë goditur me mjete të forta shtetasin K. L., 59 vjeç, banues në Tepelenë (mësues), kanë ndaluar njërin prej autorëve të dyshuar, shtetasin: A. G., 29 vjeç, banues në Tepelenë, për veprat penale “Plagosja e lehtë me dashje”, kryer në bashkëpunim dhe “Vetëgjyqësia”. Vijon puna intensive për identifikimin, kapjen dhe vënien përpara përgjegjësisë ligjore të bashkëpunëtorëve të tij.
Gjithashtu, në vijim të veprimeve hetimore, nga specialistët e Seksionit për Hetimin e Krimeve në Komisariatin e Policisë Tepelenë u bë ndalimi i shtetasit të dëmtuar K. L., 59 vjeç, për veprat penale “Ngacmimi seksual” dhe “Kallëzimi i rremë”. Ndalimi i këtij shtetasi u bë pasi nga kallëzimet e marra në lidhje me këtë rast, dyshohet se ai ka ngacmuar seksualisht 2 shtetase të mitura. Materialet procedurale i kaluan Prokurorisë pranë Gjykatës së Rrethit Gjyqësor Gjirokastër, për veprime të mëtejshme”, njofton Policia.
/rtsh.al/
