Sot në Bruksel zhvillohet takimi i katërt mes kryenegociatorit të Kosovës Besnik Bislimi dhe atij serb Petar Petkoviç për të diskutuar rregulloren e Bankës Qendrore të Kosovës, e cila nga 1 shkurti ka ndaluar përdorimin e dinarit serb në territorin e saj.
Bashkimi Europian pret nga palët që të arrijnë një marrëveshje. “Rezultatet e bisedimeve varen nga aftësia e të dyja palëve, të cilat duhet të sillen në mënyrë evropiane dhe të arrijnë një marrëveshje”, u shpreh zëdhënësi Piter Stano.
Ndërkaq kryeministri Albin Kurti thotë se vendimi i Bankës Qendrore është i panegociueshëm. Qeveria vazhdon të kritikohet nga opozita, pasi sipas saj i ka bërë temë në dialogun e Brukselit çështjet e brendshme të Kosovës .
I dërguari i Bashkimit Evropian, Miroslav Lajçak në takimin e fundit të kryenegociatorëve propozoi një zgjidhje të përkohshme për çështjen e dinarit, i cili u pranua nga pala kosovare, por u refuzua nga Serbia.
Gazetar: V. Zhari
/RTSH/
