Në kuadër të vizitës së presidentes sllovene Natasha Pirc Musar në Radio Televizionin Shqiptar, Orkestra e RTSH-së do të luajë për nder të saj pjesë nga kompozitori i njohur slloven Bojan Adamiç.
Duke folur në një intervistë për RTSH-në, etnomuzikologu Vasil Tole theksoi se Bojan Adamiç ka dhënë një kontribut të veçantë për Shqipërinë dhe Kosovën në fushën e muzikës.
Sipas Toles, orkestrimet e Adamiçit kanë qenë model për klasën muzikore të kompozitorëve të Kosovës.
“Bojan Adamiç ka dhënë një kontribut të spikatur përveç Shqipërisë pasi u largua, edhe në jetën muzikore të Kosovës. Madje orkestrimet e tij kanë qenë model për klasën muzikore të kompozitorëve të Kosovës për mënyrën sesi kompozohet orkestracioni modern me idiomat e muzikës folklorike. Adamiçi është i respektuar nga ne për shkak të kontributit që ka dhënë në një kohë të vështirë por shumë të domosdoshëm për muzikën shqiptare”, u shpreh Tole.
Tole e konsideroi luajtjen e pjesëve muzikore të kompozitorit Adamiç nga orkestra e RTSH-së, si një mirënjohje ndaj figurës dhe kontributit të tij në muzikën shqiptare.
“Kjo që po bën Radio Televizioni Shqiptar, që e ka bërë Akademia e Shkencave që e ka kujtuar me disa veprimtari, Ministria e Kulturës apo Qendra Ndërkombëtare e Librit duke financuar botimin e librit “Kompozitori Bojan Adamiç në Shqipëri”, është një shenjë pjekurie e institucioneve tona për të thënë; faleminderit një kolegu apo një shteti të nderuar siç është Sllovenia”, theksoi Tole.
/rtsh.al/