Në qytetin e Augsburgut, një nga rajonet e Gjermanisë, jetojnë mbi 300 mijë qytetarë, mes të cilëve edhe 8 mijë shqiptarë të Shqipërisë, Kosovës, Maqedonisë së Veriut, Malit të Zi etj.
Në këtë qytet, komuniteti shqiptar ka një numër shumë të madh aktivistësh, ku bashkërisht japin kontributin e tyre në shërbim të ruajtjes së gjuhës amtare, kulturës, traditës, por edhe sportit.
Mislim Berisha është një nga këta aktivistë, i cili e la Kosovën më shumë se tri dekada duke u vendosur fillimisht në Suedi e më pas në Gjermani.
Për mikrofonin e RTSH-së, ai rrëfen se si u gjet në këto dy vende dhe objektivat e tij që kanë qenë dhe janë dy: klasat e gjuhës shqipe dhe rinia.
Për gjuhën shqipe, mësuesja, e cila mëson çdo germë dhe fjalë të fjalorit tonë, rrëfen për mikrofonin tonë se eksperienca është e paharrueshme dhe se prej një viti numri i nxënësve të saj shqiptarë rritet.
Por, në Gjermani pjesë e jetës së shqiptarëve atje është edhe kultura jonë.
Fëmijët shqiptarë janë shumë të interesuar për vallet tradicionale, të cilat i pëlqejnë, por edhe i mësojnë mjaft mirë.
Mësuesja Valjeta Kuqi, që i praktikon për transmetimin e valleve tradicionale, rrëfen se numri i nxënësve të saj është rritur dhe synohet që të rritet çdo ditë e më shumë.
Edhe koordinatori i shkollës shqipe, Sami Kuqi, thekson se grupet e valltarëve kanë marrë pjesë në parada kulturore, ndërsa synohet që në të ardhmen të prezantohen edhe më fuqishëm te komuniteti vendas dhe jo vetëm.
Jo vetëm kaq, por në mes të qytetit të Augsburgut, shqiptarët kanë vendosur atje edhe shtatoren e Shën Terezës, emrin e së cilës synojnë që në të ardhmen, pse jo ta ketë edhe Klinika Universitare Shëndetësore e këtij qyteti.
Por jo vetëm gjuha amtare, kultura e tradita!
Në Augsburg, pjesë e shoqatës FC Alba është edhe sporti, për të cilin të gjithë shqiptarët janë bashkuar dhe kanë krijuar ekipe sportive, duke kulmuar me krijimin e Klubit të Futbollit dhe ngritjen e tij në kategori.
Por, si erdhën shqiptarët në Augsburg dhe si u integruan?
Afërdita Berisha është tashmë nëna e tri djemve, e cila la gjithçka në Shqipëri dhe u bashkua me bashkëshortin e saj në Gjermani, aty ku fillimisht e pati të vështirë, por ishte pikërisht bashkëshorti, ai që e orientoi përshtatshmërinë e saj atje.
Znj. Berisha rrëfen se atje themeloi edhe grupin e parë të vajzave dhe grave shqiptare ndërsa asnjëherë nuk harroi synimin e çdo nëne shqiptare: Mësimin e gjuhës shqipe nga fëmijët e saj!
Njësoj si Afërdita, Edita Kryeziu erdhi nga Peja dhe iu dedikua profesionit të aq shumë dëshiruar prej saj, estetikës. Ajo tregon se pas studimeve përkatëse hapi biznesin e saj, aty ku punon me qytetarë të kombësive të ndryshme, por për vajzat dhe gratë shqiptare ajo ka edhe mesazhi e saj.
Jo vetëm vajzat dhe gratë shqiptare, por edhe produktet vendore të shqiptarëve kudo që janë, u mbështetën fuqishëm nga djemtë dhe burrat që u vendosën në këtë qytet dhe me shumë punë arritën të fuqizoheshin ekonomikisht.
I tillë është edhe Fitim Thaçi, i cili vendosi të hapë rrjetin e supermarketeve Made in Albania.
Ai rrëfen se qytetarët e Augsburgut, pa dallim kombësie, preferojnë shumë prodhimet shqiptare dhe se nga gjermanët, me të cilët bashkëpunon, ka mësuar praktika pune që e kanë fuqizuar atë.
Produktet Made in Albania u sollën në Gjermani edhe përmes gastronomisë.
Alfons Tanushi rrëfen se ai vjen nga një familje e madhe, por se në Augsburg, bashkë me vëllezërit, hapën restorantin e parë shqiptar.
Vështirësitë e para ai i konsideron të mëdha, kur gjermanët pak dinin për shqiptarët.
Tradita dhe kultura shqiptare janë sjellë në Augsburg edhe përmes produkteve të stampuara, ku Asllan Qarri na tregon se si vendosi që të krijojë një biznes nga i cili traditën, kulturën dhe historinë shqiptare ta përcjellë brez pas brezi edhe në aspektin vizual.
Ai na tregon se vetëm përmes punës, gjermanët kanë kuptuar vlerat thelbësore të shqiptarëve.
Ndërsa Skënder Qarri nga Hasi i Shqipërisë, ka një nga lokalet në qendër të qytetit, aty ku fluksi i turistëve është i lartë dhe rakia e Shqipërisë apo specat e mbushur kërkohen masivisht.
Sektori i ndërtimit, sidomos godinave të vjetra dhe autoktone, ka marrë vëmendjen e shqiptarëve, të cilët pasi janë arsimuar dhe certifikuar nga institucionet gjermane, po kontribuojnë fuqishëm për rikonstruksionin e tyre apo edhe ndërtimin e godinave të reja të strehimit, shërbimeve apo fushave të tjera.
Përveç kontributit në shumë sektorë të jetës së Augsburgut, shqiptarët atje nuk lënë pas pa vëzhguar edhe jetën politike të shqiptarëve kudo që janë.
Arsim Sokoli erdhi në Gjermani si azilant politik, ndaj dhe mendon se qeveritë tona duhet të jenë më bashkëpunuese për të mirën e shqiptarëve.
Lidhur me njohjet e reja të shtetit të Kosovës, Sokoli thotë se përmes sportit mund të ketë më shumë rezultate, ndaj mendon se sportistët shqiptarë duhen mbështetur fuqishëm, duke qenë se i konsideron ambasadorët e vërtetë edhe në ato vende që nuk e kanë njohur ende Kosovën si shtet.
Statistikat flasin se në Gjermani nga të gjitha Trojet shqiptare jetojnë rreth 700.000 shqiptarë, ku mbi 610.000 janë vetëm nga Kosova.
Gazetare: Flutura Tota
/rtsh.al/
