Jemi në sezonin e krasitjes së vreshtave dhe pemëve, dhe Nexhip Kaculin e gjejmë në mes të punës së tij.
Me gërshërët në dorë, ai ndan eksperiencën e tij shumëvjeçare mbi rëndësinë e krasitjes dhe teknikat e duhura që duhen ndjekur.
Mjeshtri i mbjelljes së frutikulturës nga fshati Krenzë i Shtiqnit, punon me pasion edhe pse i ka kaluar të 75-tat.
E gjejmë duke krasitur në vreshtarinë e tij, ku na tregon për sekretet dhe rëndësinë e krasitjes tek rrushi
Mjeshtër i frutikulturës thotë për RTSH se, “ tani është koha për e mirë për të filluar tani krasitja sepse më vonë fillon dhe merr dhe lëng. Dhe nëse nxjerr lëng ardhja, dëmtohet sythi tjetër duke e rralluar prodhimin.
Sipas Kaculit, krasitja nuk është një proces i thjeshtë, ajo ka disa sekrete që duhet të zbatohen me kujdes te pemët apo rrushi për të siguruar prodhim të shëndetshëm dhe cilësor.
“Krasitësi duhet të ketë parasysh rrënjën e rrushit kur bënë krasitjen. Dhe në bazë të shëndetit të saj e dobët apo e fuqishme, krasitësi duhet të ketë parasysh që ta lëri ngarkesën më tepër sepse nëse krasitet rrënd ajo hedh shumë lastar dhe prodhimi nuk piqet sepse krijohet hije nga gjethet e shumta.”- shprehet Nexhip Kaculi.
Në parcelën e tij, Kaculi ka mbjellë lloje të ndryshme rrushi. Megjithatë, ai nuk i rekomandon disa prej tyre për fermerët e tjerë, pasi kërkojnë kujdes të veçantë dhe kushte specifike për të dhënë rezultate të mira.
Kur bëhet fjalë për krasitjen e pemëve, ai thekson se dy nuk duhet të priten ose ndërhyhet në degët e tyre, pasi kjo mund të dëmtojë pemën dhe prodhimin e saj.
“Qershia është një pemë që nuk duhet të ndërhyhet vetëm në rast se ka dëmtime apo thyhet ndonjë degë dhe e kruan më pas me sharrë apo me thikë duke e bërë ata të lëmuar si xham dhe nuk merr lagështirë. Edhe arra nuk lejon krasitjen”-thotë më tej ai.
Megjithëse është 76 vjeç, Nexhip Kaculi vazhdon të punojë me të njëjtin përkushtim dhe pasion si në vitet e rinisë së tij. Për të, krasitja nuk është vetëm një punë, por një art që kërkon dashuri dhe vullnet.
/rtsh.al/
