Ka nisur këtë të hënë (7 tetor) procesi mësimor për të gjithë studentët. Janë mbi 20 mijë studentë të cilët do të ulen sot për herë të parë në auditorët e universiteteve.
Ky numër pothuajse është i njëjtë me atë të një viti më parë dhe gjithashtu preferencat për programet e studimit kanë mbetur të njëjtat.
Më të kërkuarat edhe për këtë vit rezultuan degët: Mjekësia e Përgjithshme, Arkitektura dhe Inxhinieritë.
Këtë vit ka patur edhe një rritje të interesit për programet prioritare të studimit që ofron Universiteti Bujqësor, ku është vënë re një tejkalim i numrit minimal të studentëve për një grup. Vetëm 2 programe në këtë universitet, Agrobiologji dhe Inxhinieri Agrare, rezultojnë me një numër të kufizuar studentësh.
Ministrja e Arsimit, Ogerta Manastirliu ka uruar studentët, teksa shkruan në Facebook: “Suksese mbi 20 mijë studentëve të cilët ulen sot për herë të parë në auditorët e universitetit dhe atyre që tashmë e kanë nisur këtë rrugëtim drejt dijes dhe formimit të së ardhmes së tyre, si dhe trupës së pedagogëve në këtë vit të ri akademik”.
Sipas ministrisë së Arsimit, Viti i ri akademik 2024-2025 në institucionet e arsimit të lartë do të përfundoj më datë 26 shtator 2025.
/rtsh.al/
