Në 1-vjetorin e sulmit të Hamasit ndaj Izraelit, kryeministri izraelit, Benjamin Netanjahu e ka cilësuar përballjen me organizatën palestineze si “luftë për ekzistencë”.
“Lufta e Rilindjes”. Kjo është ajo që unë do të doja ta quaja zyrtarisht këtë luftë”, është shprehur Netanjahu.
Ai ka theksuar se lufta ndaj boshtit të së keqes së prodhuar nga Irani është kusht për mbijetesën e Izraelit, teksa deri më sot konflikti njëvjeçar kundër Hamasit është njohur zyrtarisht me emrin e fushatës ushtarake, “Shpatat e Hekurt”.
“Kundërsulmi ynë kundër armiqve tanë në boshtin e së keqes të Iranit është një kusht i domosdoshëm për të siguruar të ardhmen tonë dhe për të garantuar sigurinë tonë. Ne do ta përfundojmë luftën kur të përfundojmë të gjitha qëllimet që kemi vendosur: përmbysjen e sundimit të djallëzuar të Hamasit, sjelljen e të gjithë pengjeve në shtëpi – të vdekur dhe të gjallë – duke penguar çdo kërcënim të ardhshëm nga Gaza për Izraelin dhe kthimin e banorëve tanë në jugu dhe veriu të sigurt në shtëpitë e tyre”, ka theksuar Netanjahu gjatë një takimi të kabinetit qeveritar.
Netanjahu shtoi se Izraeli “po ndryshon realitetin e sigurisë në rajon”.
“Për hir të fëmijëve tanë, për hir të së ardhmes sonë, për të siguruar që ajo që ndodhi më 7 tetor nuk do të ndodhë më kurrë”, tha ai më tej.
Në takim, Netanjahu ndezi një qiri përkujtimi në nderim të viktimave dhe më pas u mbajt një minutë heshtje.
/rtsh.al/
