Gjigandi mediatik RTSH ka nisur me herët se çdo vit tjetër sezonin e ri televiziv, një sezon që është pararojë në kohë edhe me mediat e tjera audiovizive në vend, ku përmes eskluzivitetit të transmetimit të Lojërave Olimpike për 17 ditë me radhë, nga data 26 korrik deri më datën 11 gusht, ekrani i RTSH-së përcolli magjinë dhe madhështinë e këtyre lojërave shoqëruar edhe nga emisioni i dedikuar “Ora Olimpike”.
Menjëherë më pas, sezoni i RTSH u pasurua më një tjetër ekskluzivitet. Që prej 18 gushtit, ekrani i shqiptarëve, në ditët më të nxehta verore, solli freski me transmetimin e kampionatit shqiptar të futbollit me ndeshjet e Abissnet Superiore, Kategoria e Parë, Kupa e Shqipërisë, Superkupa, Final Four dhe Kampionati i Femrave.
Nga dita e parë e kampionatit morën startin edhe dy emisionet të reja sportive dedikuar këtij kampionati: “Rubrika sportive” që vjen çdo të diel me një koncept të ri në orën 22:30 në kanalin RTSH 1 nën moderimin e Albana Bejkos dhe emisioni “Supergol” në çdo fillim dhe mbarim ndeshjeje në kanalin RTSH Sport nën drejtimin e gazetares dhe moderatores, Hygerta Sako.
Duke filluar nga nesër, datë dy shtator, rikthehen në ekran e RTSH 1 emisioni politik “3D” i gazetarit Alban Dudushi, i njohur për analizën e thellë të temave mbi aktualitetin politik në vend, rajon dhe botë, peshën e debatit si dhe rëndësinë e të ftuarve, në orën 21:00 të mbrëmjes.
Nga kjo e hënë, datë 2 shtator nis rrugëtimin e përditshëm në ekranin e kanalit RTSH 1 edhe emisioni më I ndjekur “Jetë shqiptare” i cili shënoi sezonin e shkuar rekorde audience nën drejtimin e gazetarëve Andri Xhahu dhe Elona Jaçellari.
Sezoni i ri televiziv do të vijojë me një qasje të jashtëzakonshme si në formë ashtu edhe në përmbajtje, me programe të reja dhe të pasura , dinamike dhe surprizuese, që do të prekin interesat e çdo grup-moshe dhe preferencat e publikut shqiptar.
Por do të kemi edhe ndryshim në oraret e edicioneve informative. Edicioni Informativ i mesditës do të spostohet një orë më herët dhe do të vijë në ekranin e RTSH 1 në orën 12:00 , me lajme krejtësisht të reja dhe të minutës së fundit si dhe me lidhje të drejtpërdrejta për ngjarje të rëndësishme, me gazetarët e aktualitetit në terren.
Ndërsa edicioni i fundit i lajmeve të ditës në këtë kanal do të transmetohet në orën 23:00 të mbrëmjes.
RTSH
