Këshilli i Ministrave miratoi të mërkurën pozicionin negociues për çeljen e negociatave për anëtarësim në Bashkimin Evropian, për grupin e parë të kapitujve i njohur si “Themeloret”.
Në një deklaratë për mediat pas mbledhjes së qeverisë, ministrja e Shtetit dhe Kryenegociatorja për Integrimin në Bashkimin Evropian, Majlinda Dhuka u shpreh se “Shqipëria hyn në një fazë të re në procesin e negociatave për anëtarësim në BE”.
“Me këtë vendim dhe me zhvillimet pozitive nga Bashkimi Evropian, vendet anëtare, Komisioni Evropian, Shqipëria hyn në një fazë të re në procesin e negociatave për anëtarësim në BE. Sigurisht ky është një proces kompleks, dinamik, me zhvillime shumë pozitive si në drejtim të progresit të Shqipërisë, reformave dhe masave, por edhe në drejtim të BE-së”, tha ajo.
Dhuka informoi se, në javët që vijnë do të priten vendimet e vendeve anëtare të BE-së, si dhe Konferencën e Dytë Ndërqeveritare për çeljen e negociatave për anëtarësim në BE.
Sipas saj, Shqipëria përparon, thellon reformat dhe avancon për të përmbushur kriteret për anëtarësim.
Dhuka shprehu bindjen se Shqipëria është në hapat e fundit të rrugës për t’i përmbushur kriteret për anëtarësim në BE.
E pyetur mbi ndikimin që ka situata e krijuar nga opozita në Kuvend në procesin e integrimit, Dhuka tha se “opozita dhe shumica në Shqipëri janë bashkë për sa i përket anëtarësimit në BE dhe i kanë marrë bashkë këto vendime të rëndësishme”.
Ajo shprehu bindjen se Shqipëria do të përparojë për t’u bërë anëtarë në BE, pavarësisht situatave të ditës.
“Shqipëria ka bërë progres të dukshëm në reformat e rëndësishme për anëtarësim, përfshirë këtu Reformën në Drejtësi dhe reforma të tjera të lidhura me funksionimin e institucioneve”, tha Dhuka.
/rtsh.al/
