Brigadat Izzedine al Qassam, krahu i armatosur i Hamasit, thotë se ka lëshuar këtë mbrëmje edhe 150 raketa të tjera drejt Tel Avivit të Izraelit.
Grupi tha se kjo ishte në “përgjigje ndaj bombardimit të kullës së banimit në qendër të qytetit të Gazës”, përmes një postimi në Telegram.
“Tani që pushtuesi ka bombarduar Kullën Palestineze në mes të qytetit të Gazës, Tel Avivi duhet të qëndrojë me njërën këmbë dhe të presë përgjigjen tonë shkatërrimtare”, tha në Telegram Abu Obaida, zëdhënës i Brigadave AlQassam.
Gazetarët e CNN në terren sirenat dhe më shumë se një duzinë shpërthimesh të forta dëgjohen në të gjithë Tel Avivin.
Sipas CNN, nuk është e qartë nëse shpërthimet e forta ishin të sistemeve anti-raketë të Izraelit apo zhurma e raketave të Hamasit që po binin në Tel Aviv.
Njihuni me disa nga detajet kryesore të asaj çfarë ka ndodhur deri më tani:
Hamasi merr përgjegjësinë: Hamasi, lëvizja militante palestineze që drejton Gazën, ka marrë përgjegjësinë për sulmin. Militantët hodhën më shumë se 2 mijë raketa nga Rripi i Gazës në Izrael, sipas ushtrisë izraelite, ndërsa luftëtarët e Hamasit hynë në Izraelin jugor nga toka, deti dhe ajri.
Hamasi thotë se ka kapur disa ushtarë izraelitë pranë kufirit, por ushtria izraelite nuk e ka konfirmuar zyrtarisht këtë informacion.
Hamasi merr "pengje dhe robër lufte": Zëdhënësi i Forcave të Mbrojtjes të Izraelit ka bërë të ditur se Hamasi ka marrë “pengje dhe robër lufte”. “Ka pengje dhe robër lufte që ka marrë Hamasi. Vdekje ka edhe në mesin e ushtarëve të IDF. Nuk kemi ende një numër të saktë - jemi në luftë”, tha ai.
Përgjigja e ushtrisë izraelite: Forcat e Mbrojtjes së Izraelit (IDF) nisën sulme kundër një numri objektivash të Hamasit në Gaza dhe po thërrasin mijëra rezervistë. Forcat e IDF po luftonin në terren të shtunën në të paktën gjysmë duzinë vendesh, duke përfshirë disa fshatra, dy baza ushtarake dhe pika kufitare.
Çfarë thotë Netanyahu: Kryeministri izraelit është zotuar se Hamasi do të “paguajë një çmim që nuk e ka ditur kurrë” për sulmin.
“Qytetarë të Izraelit, ne jemi në luftë – jo në një operacion, as në raunde, por në luftë”, tha ai në një video-mesazh.
Skena në terren: Banorët e dy komuniteteve izraelite i thanë stacionit televiziv Channel 12 të vendit se sulmuesit nga Gaza po përpiqen të hyjnë në shtëpitë e tyre.
Ata janë lutur vazhdimisht në TV për ndihmë nga ushtria izraelite. Ndërkohë, fotot ofrojnë disa nga pamjet e para në terren, dhe IDF ka publikuar video të atyre që thotë se janë sulme ajrore ndaj objektivave të Hamasit në Gaza.
Alarm në të gjithë botën: Zyrtarët amerikanë e kanë parë me shqetësim sulmin në shkallë të gjerë. Presidenti amerikan Joe Biden ka telefonuar kryeministrin izraelit Netanjahun duke i shprehur mbështetjen ndërsa liderët në mbarë botën, siç ka ndodhur gjatë konflikteve të mëparshme, bëjnë thirrje për qetësi dhe përmbajtje.
Brazili kërkon mbledhjen e Këshillit të Sigurimit: Ministria e Jashtme e Brazilit ka kërkuar mbledhje urgjente të Këshillit të Sigurimit të Kombeve të Bashkuara pas sulmit të forcave të Hamasit ndaj Izraelit. Brazili, i cili mori presidencën e radhës të Këshillit të Sigurimit të OKB-së këtë muaj, dënoi sulmet në një deklaratë publike dhe shprehu solidaritetin me popullin e Izraelit.
Antonio Guterres: Të veprojë diplomacia që të ndalet konflikti! Sekretari i Përgjithshëm i Organizatës së Kombeve të Bashkuara Antonio Guterres ka bërë të ditur se dënon në termat “më të ashpër sulmin e sotëm në mëngjes nga Hamasi kundër qyteteve izraelite pranë Rripit të Gazës dhe Izraelit qendror, duke përfshirë hedhjen e mijëra raketave drejt qendrave të popullsisë izraelite”. Guterres kërkon të gjitha përpjekjet diplomatike për të shmangur vijimin e konfliktit.
Një datë domethënëse: Sulmi i befasishëm erdhi në 50-vjetorin e Luftës së vitit 1973, në të cilën shtetet arabe sulmuan Izraelin në Yom Kippur, ditën më të shenjtë të kalendarit hebre, transmeton CNN.
/rtsh.al/
