Jetën ia kushtoi të rinjve, dhe inxhinieri i njohur Agim Mero shkoi në amshim si një dëshmitar mbi të vërtetat e së shkuarës.
Agim Mero ishte një ndër personazhet kryesore të organizimeve masive në kohën e socializmit.
Me profesionin inxhinier Agim Mero arriti deri në postin e Sekretarit kryesor të Rinisë në Komitetin Qendror, por pas viteve '70, kur Enver Hoxha ndërmori iniciativën e tij ideologjike, Agim Mero u shkarkua dhe shpëtoi për pak nga burgu.
"Goditja qe për liberalizmin, për liberalizmin e rinisë. Si anëtar i Komitetit Qendror mua më përjashtuan dhe më çuan në Laç," tregonte ai dikur për emisionin "Autor" në RTSH.
Agim Mero tregoi si pakkush të mirat dhe të këqijat e kohës së socializmit, duke mbetur nga të paktët individë pas viteve '90 që ka treguar pa komplekse periudhën e emancipimit të shoqërisë shqiptare, arsimimin dhe përkushtimin idealist, ashtu si edhe problematikat e saj.
"Deri në 1945 ishim 92 për qind analfabetë, pothuaj i gjithë populli," kujtonte ai atëherë.
Inxhinieri i cili mbajti edhe postin e kryetarit të Forumit Joqeveritar për Mbrojtjen e Monumenteve të Kulturës në Gjirokastër, aty ku edhe lindi, do të mbahet mend si njeriu që nuk lejoi që gazeta "Studenti" të kritikonte prezantuesit e Festivalit të 11-të në Radio Televizionin Shqiptar.
/rtsh.al/
