NATO filloi stërvitjen e saj vjetore bërthamore “Steadfast Noon” me më shumë se 60 avionë që marrin pjesë në fluturime stërvitore mbi Evropën Perëndimore.
“Steadfast Noon” është një test i rëndësishëm që NATO zhvillon çdo vit për parandalimin e sulmeve bërthamore, duke i dërguar një mesazh të qartë çdo kundërshtari se NATO do të mbrojë të gjithë aleatët.
"Parandalimi bërthamor është gur themeli i sigurisë së Aleatëve. “Steadfast Noon” është një provë e rëndësishme e parandalimit bërthamor të Aleancës dhe i dërgon një mesazh të qartë çdo kundërshtari se NATO do të mbrojë të gjithë aleatët”, tha sekretari i Përgjithshëm i NATO-s, Mark Rutte.
“Steadfast Noon” zgjat dy javë dhe përfshin avionë luftarakë të aftë të mbajnë koka bërthamore amerikane. Stërvitja bërthamore e NATO-s është një aktivitet trajnimi rutinë që ndodh çdo tetor. Kjo stërvitje përfshin 2,000 personel ushtarak nga tetë baza ajrore dhe një sërë llojesh avionësh, duke përfshirë avionë me aftësi bërthamore, bombardues, përcjellje luftarake, avionë furnizues me karburant dhe aeroplanë të aftë për zbulim dhe luftë elektronike. Stërvitja e këtij viti përfshin fluturime kryesisht mbi vendet pritëse Belgjikë dhe Holandë dhe në hapësirën ajrore mbi Danimarkë, Mbretërinë e Bashkuar dhe Detin e Veriut.
NATO po ndërmerr hapa për të garantuar sigurinë, paqen, efektivitetin dhe besueshmërinë e parandalimit të sulmit bërthamor ndaj vendeve të Aleancës.
/rtsh.al/
