RTSH 24 Live

Rajoni

Media serbe: Greqia mund të njohë pavarësinë e Kosovës

21/09/2022

Media serbe: Greqia mund të njohë pavarësinë e Kosovës

5 vende të BE-së, Greqia, Spanja, Qipro, Sllovakia dhe Rumania, nuk kanë njohur ende pavarësinë e Kosovës, por duket se qëndrimi i njërit prej këtyre vendeve do të ndryshojë. Media serbe ‘Danas’ thotë se Greqia është afër njohjes së pavarësisë së Kosovës.

“Greqia është më e afërta me këtë sepse aktualisht po e trajton Kosovën në çdo gjë si shtet të pavarur dhe është vetëm çështje kohe se kur do ta bëjë këtë zyrtarisht. Deri më tani, Greqia nuk e ka njohur Kosovën për shkak të interesave të atij vendi dhe dinamikës rajonale të marrëdhënieve, por problemi kryesor ballkanik që kishte Greqia, mosmarrëveshja me Maqedoninë e Veriut , është zgjidhur. Ata nuk kanë asnjë pengesë tjetër për çështjen e pavarësisë përveç Qipros”, thonë burimet për mediat serbe.

Gjermania dhe Franca kanë një plan me 13 pika për dialogun ndërmjet Beogradit dhe Prishtinës dhe normalizimin përfundimtar të marrëdhënieve në bazë të njohjes reciproke parasheh që të gjitha pesë vendet e mbetura të BE-së ta njohin pavarësinë e Kosovës.

Plani parashikon një kornizë të re për dialogun ndërmjet Kosovës dhe Serbisë, e cila do të kërkonte që të dyja palët të arrijnë një marrëveshje përfundimtare formale për njohjen brenda 10 viteve të ardhshme, të cilat do të jenë parakusht për anëtarësimin e të dy vendeve në BE.

/rtsh.al/