Kryeministri Edi Rama e ka cilësuar dokumentarin e Rai 3, të neveritshëm dhe të mbushur me paragjykime për Shqipërinë. Në një intervistë për “Corriere Della Sera” , Rama thekson se ka kontaktuar me drejtuesit e televizionit italian duke shpjeguar se “unë i kam komunikuar shërbimit publik një fakt shumë serioz, për të cilin përndryshe ai nuk do të ishte informuar”
Rama ka theksuar se ai nuk tërhiqet nga qëndrimi i tij pasi sipas kryeministrit me dokumentarin e Rai3 u godit Shqipëria.
“Për fat të keq, unë atë fjalë nuk mund ta fshij. As vetë inteligjenca artificiale nuk gjen dot një fjalë tjetër e cila ta përshkruajë më mirë atë episod. Dua të sqaroj megjithatë se nuk kam protestuar”, shprehet Rama.
Intervista e plotë:
A ju duket normale dhe e drejtë që kryeministri i një vendi tjetër, sado miqësor, të bëjë presion ndaj televizionit shtetëror? Partitë që kundërshtojnë qeverinë Meloni e quajnë këtë një skandal.
Rama: Përpara se të merren me natyrën e fjalës sime dhe të flasin për skandale, miqtë e mi të dashur të opozitës italiane duhet të interesohen për shkaqet dhe të përpiqen të kuptojnë se dinjiteti dhe transparenca janë të rëndësishme si kur flitet për shërbimin publik italian,ashtu edhe kur bëhet fjalë për institucionet publike shqiptare dhe njerëzit që i përfaqësojnë ato. Unë nuk kam as mjetet dhe as qëllimin të imponoj diçka në punët e brendshme të vendit tuaj. Por kam ndërkohë detyrën të mbroj vendin tim nga stereotipi i tmerrshëm i një epoke tjetër, i krijuar nga mediat në Itali për Shqipërinë dhe shqiptarët”.
A nuk është e vërtetë se puna në qendrat e paraburgimit të emigrantëve është shumë prapa me planin? Dhe se shpenzimet 650 milionë euro që priten në pesë vjet, janë fryrë në një miliard?
Rama: Po çfarë lidhje kanë me ne polemikat tuaja të brendshme lidhur me flukset, kostot, kontratat e kështu me radhë? Asgjë. Dhe çfarë lidhje ka fakti që sekretari i përgjithshëm i qeverisë shqiptare ishte avokat penal në Itali më shumë se dhjetë vjet më parë me paktin për emigrantët? Dhe për çfarë arsyeje të pakuptueshme duheshin thënë gënjeshtra dhe të eksportoheshin shpifje nga Shqipëria në Itali, për t’u hedhur në sytë e publikut të Reportit si ato gurët që i lëshoheshin shtrigave?
Ish-avokati i krimit Ëngjëll Agaçi, i cili dikur mbronte mafiozët dhe trafikantët shqiptarë të drogës dhe që sot është sekretar i përgjithshëm i qeverisë së tij, është njeriu kyç i protokollit apo jo?
Rama: Kundër Agacit, ka pasur një furi joracionale. Përtej dëmit, edhe tallja. Pasi censuruan pyetje-përgjigjet e kërkuara nga programi ndaj Sekretari të Përgjithshëm dhe të cilave ai pranoi që tu përgjigjej… pasi ai u përgjigj me email, ata vazhduan ta akuzonin se nuk kishte pranuar të përgjigjej. Ishte një gabim i rëndë për t’u gëlltitur në heshtje.
Një formë kompensimi ishte arsyeja përse i kërkuat drejtuesit të Report, Sigfrido Ranucci, mundësinë që të përgjigjeshit me një intervistë live?
Rama: Nuk kam kërkuar asnjë dëmshpërblim. Të enjten shkëmbeva një mesazh miqësor me drejtuesin Ranucci, pasi publikova në ‘X’ reagimin tim ndaj një ndërhyrjeje të tij në një televizion shqiptar. Ndoshta do t`ia arrijmë më në fund t`i japim vlerë arsyeve tona në programin e tij, pa u censuruar.
Meqë ra fjala, çfarë mendoni për censurën e Scuratit nga Rai?
Rama: Nuk i di detajet e çështjes.
Megjithatë, duhet të dini detajet e marrëveshjes për dëbimin e emigrantëve të nënshkruar me Melonin. Do të kushtojë shumë para dhe nuk do të zgjidhë asgjë? Edhe ju vetë, kryeministër e keni pranuar se keni dyshime…
Rama: Nëse nuk ke dyshime duke u përpjekur të hapësh faqe të reja të çfarëdo lloji, atëherë jeton një hap larg dështimit, kaq”.
Opozita akuzon Melonin se hedh sytë nga modeli Orban për çështjen e të drejtave civile dhe lirisë së informacionit dhe shtypit. Gabojnë ata, apo ka vërtet diçka për t’u shqetësuar?
Rama: Si mund ta them unë se kush ka të drejtë dhe kush e ka gabim, nëse duke ndërhyrë civilisht për një çështje shumë serioze të censurës dhe dezinformimit të lirë që prek Shqipërinë, u gjenda në mes të stuhisë italiane, ku lufta politike nuk merr të burgosur?
Ju siguruat se nuk e telefonuat miken tuaj kryeministren përpara se të merrnit drejtor Corsinin. Po më pas, folët e Melonin? Dhe çfarë i thatë njëri-tjetrit?
Rama: Nuk kam folur me Giorgia Melonin, sepse e imja është një betejë për të vërtetën dhe dinjitetin e Shqipërisë dhe të shqiptarëve. Kryeministrja juaj nuk ka asnjë lidhje me të, edhe pse vendi im u tërhoq në këtë valle si një objektiv kolateral i sulmit kundër qeverisë së saj.
/rtsh.al/
