Këtë të shtunë (1 shkurt), do të bëhet shkëmbimi i katërt i pengjeve izraelitë dhe të burgosurve palestinezë në kuadër të marrëveshjes së arritur mes Izraelit dhe Hamasit për një armëpushim në Rripin e Gazës.
Hamasi pret që Izraeli të lirojë 183 të burgosur palestinezë të shtunën, ndërsa Izraeli do të lirojë 90 të burgosur palestinezë.
Pesëmbëdhjetë pengje, dhjetë izraelitë dhe pesë tajlandezë dhe 400 të burgosur palestinezë tashmë janë liruar që kur një armëpushim midis Izraelit dhe Hamasit hyri në fuqi pas më shumë se 15 muajsh luftë në Rripin e Gazës.
Gjatë gjashtë javëve të fazës së parë të armëpushimit, do të lirohen gjithsej 33 pengje izraelite, tetë prej të cilëve janë të vdekur dhe rreth 1900 të burgosur palestinezë
Pas shkëmbimit, sipas kushteve të marrëveshjes, pika e kalimit të Rafahut, në pjesën jugore të Rripit të Gazës në kufirin me Egjiptin, do të rihapet për herë të parë që nga maji 2024, kur u vu nën kontrollin e Izraelit.
Nëpërmjet kësaj, të sëmurët dhe të plagosurit do të mund të largohen nga enklava palestineze.
Bazuar në kushtet e marrëveshjes, negociatat për fazën e dytë të armëpushimit pritet të fillojnë të hënën. Gjatë kësaj kohe do të lirohen pengjet e fundit dhe do të diskutohet për fundin përfundimtar të luftës, diçka që disa anëtarë të qeverisë izraelite e kundërshtojnë.
Herën e fundit, Hamasi liroi tre izraelitë dhe pesë tajlandezë në Gaza, ndërsa Izraeli liroi 110 të burgosur palestinezë. Ky ishte shkëmbimi i tretë i këtij lloji që kur armëpushimi midis Izraelit dhe Hamasit hyri në fuqi më 19 janar.
/rtsh.al/
