Sekretari amerikan i Shtetit Marco Rubio i ka bërë të ditur ministrit të Jashtëm italian Antonio Tajani se Uashingtoni “nuk do të heqë dorë nga Ukraina”.
Gjatë bisedës së tij të fundit me Rubion, Tajani theksoi gjithashtu rëndësinë e pranisë së vazhdueshme të SHBA në Afrikë dhe Mesdhe.
Në të njëjtën kohë, ai deklaroi se “mësimi” kryesor nga presidenca e Donald Trump është se Evropa duhet të mbrojë në mënyrë më aktive interesat e veta.
“Evropa duhet të jetë e fortë jo vetëm në zbatimin e rregullave, por edhe politikisht dhe ekonomikisht” tha ai.
Më parë, Rubio tha se lufta në Ukrainë është zvarritur dhe duhet të zgjidhet në negociata ku të dyja palët do të duhet të bëjnë kompromis.
Më 20 janar, Trump tha se presidenti rus Vladimir Putin “po e shkatërron Rusinë duke mos bërë një marrëveshje” dhe kërcënoi se Moska “do të ketë probleme të mëdha” nëse kjo nuk ndodh.
Më 22 janar, ‘The Wall Street Journal’ raportoi se Trump udhëzoi të dërguarin special për Rusinë dhe Ukrainën, Keith Kellogg, që t'i jepte fund luftës në 100 ditë.
/rtsh.al/
