Në Kuvendin Kombëtar Rinor të PS-së, kryesocialisti Edi Rama u shpreh optimistë për marrjen e një mandati të katërt, teksa përmendi edhe njëherë premtimin për anëtarësimin e Shqipërisë në BE deri në vitin 2030. Sipas kryeministrit Rama, Partia Socialiste që ai drejton është e vetmja forcë politike që mund ta bëjë realitet integrimin e vendit Bashkimin Europian.
“PS do ta marrë mandatin e katërt për ta ngjitur atdheun tonë në majën e lartë të 2030. Aty ku Shqipëria do të jetë më në fund si gjithë Europa. Në atë majë ne do ta vendosim përgjithnjë flamurin tonë kombëtar aty ku është oborri i shtëpisë së familjes europiane ku do të hymë nga dera kryesore si të barabartë mes të barabartësh, anëtarë të BE. 100 ditë nga sot, shqiptarët brenda dhe jashtë Shqipërisë, do të na mbështetin më shumë se asnjëherë më parë. Jo thjeshtë se ne jemi më të mirët, por sepse si asnjëherë tjetër, Shqipëria i është afruar saj maje. Shqiptarët që të gjithë duhet ta dinë që sidoqoftë, shumica e tyre e di fare mirë, atë majë që tani shihet me sy dhe në një distancë arrihet në këmbë si një realitet konkret dhe i prekshëm dhe jo si një ëndërr që nuk realizohet kurrë, nuk e afroi koha, por vizioni, skuadra dhe përpjekja jonë e jashtëzakonshme e të gjithë këtyre viteve”, tha Rama.
Ambica e PS-së, tha Rama, është marrja e një shumice si asnjëherë më parë.
“Do ngremë në këmbë një shumicë të madhe si asnjëherë më parë për t’i thënë një “po” shurdhuese Shqipërisë brenda në Eruopë dhe një “jo” të madhe Shqipërisë prapë në gropë. Nuk do të jetë betejë e lehtë sepse ambicia jonë është e madhe. Problemi ynë as këtë herë nuk do të jenë kundërshtarët, por edhe më shumë sesa herët e shkuara do të jetë llumi, që këtë herë do të vërshojë edhe me më shumë tërbim. Nuk do tja dalin, përkundrazi, kanë për ta marrë mbrapsht syve siç e meritojnë, por do të na duhet shumë durim, shumë energji dhe shumë këmbëngulje deri në fund të këtyre 100 ditëve”, u shpreh kryeministri.
Ai i bëri thirrje të rinjve që të votojnë PS, teksa nuk la pa sulmuar edhe kundërshtarët politikë. Për Ramën, vota për PD-në është një votë e humbur “në oxhakun e një partie të vjetër që të vetmen gjë demokratike ka llagapin e saj”.
“Shqipëria një vend që në një dekadë e rriti më shumë se 2 herë e gjysmë PBB. Ndaj të gjithë duhet ta dinë mirë se kjo nuk është koha për të lozur me fatin e Shqipërisë, duke e djegur votën në oxhakun e një partie të vjetër që të vetmen gjë demokratike ka llagapin e saj, apo në mangallët e ca partiçkave të reja që të vetmen gjë të re kanë moshën e pronarëve të tyre. Kjo është koha kur Shqiptarët duhet ta përdorin votën për Shqipërinë 2030, për Shqipërinë Europë të Ballkanit. Për ta arritur Shqipërinë e vitit 2030, ka vetëm një trend për të gjithë, Partia Socialiste. Vota për ne është e vetmja votë për ndryshimin, vota për të tjerët është një votë e sigurt për zhgënjimin”, theksoi ai.
Rama premtoi se ne mandatit e 4-ët do t’i jepet goditja finale korrupsionit, pasi inteligjenca artificial do përdoret në prokurimet publike.
“Në gjysmën e parë të mandatit të katër, Shqipëria do të bëhet vendi europian që do të fusë inteligjencën artificiale në prokurimet publike, duke i dhënë korrupsionit të njëjtën goditje që ealbania i dha sporteleve, radhëve, bakshisheve. Ato ishin normaliteti i kohës së atyre që nga këneta duan ta rikthejnë Shqipërinë prap në kënetë. 47 milionë shërbime ka dhënë ealbania gjatë këtyre viteve”, deklaroi kreu i qeverisë.
/rtsh.al/
