Kryeministri i Kosovës Albin Kurti tha se rajoni i Ballkanit ka gëzuar shkallën më të madhe të paqes, lirisë dhe demokracisë gjatë 25 viteve të fundit, por se kjo mund të ndryshohet nëse Rusia mbizotëron në Ukrainë dhe inkurajon zgjerimin serb.
Gjatë një interviste për “Associated Press”, Kurti theksoi rëndësinë që Perëndimi të qëndronte i bashkuar në mbështetje të Ukrainës, ndërsa ajo mbrohet nga agresioni rus.
“Këto 25 vite në këtë shekull, ky ka qenë një çerek shekulli me shkallën më të lartë të paqes, lirisë dhe demokracisë në Ballkan. Me Serbinë një hegjemon rajonal dhe përfaqësues rus, këto 25 vite paqeje, lirie dhe demokracie në Ballkan, të paprecedentë në vendin tonë, janë sërish në rrezik. Një Rusi më e fortë do të trimëronte Serbinë dhe se jo vetëm Kosova, por edhe Bosnja, Mali i Zi dhe ndoshta Maqedonia e Veriut do të rrezikoheshin nga ambiciet ekspansioniste serbe”, tha Kurti.
Marrëdhëniet ndërmjet Kosovës dhe Serbisë mbeten të tensionuara dhe bisedimet 13-vjeçare të normalizimit të ndihmuara nga Bashkimi Evropian nuk kanë arritur të bëjnë përparim, veçanërisht pas një shkëmbimi zjarri në shtator të vitit të kaluar midis serbëve të maskuar të armatosur dhe policisë së Kosovës që la të vdekur katër persona.
“Presidenti despotik Putin do të inkurajohej të vazhdojë më tej me përpjekjet e tij për destabilizimin, aq më tepër nëse ai ndihet i suksesshëm në Ukrainë. Unë me të vërtetë nuk dua të besoj se ai mund të fitojë teorikisht. Por ai që mendon se (ai) mund të fitojë është mjaft problematik”, tha Kurti.
Përpjekjet serbe për të ruajtur dominimin ndërsa ish-Jugosllavia u nda në vitet 1990, shkaktuan luftërat më shkatërruese në Evropë që nga Lufta e Dytë Botërore, të paktën deri në pushtimin e Ukrainës nga Rusia më 24 shkurt 2022.
Serbia nuk e njeh pavarësinë e Kosovës dhe mijëra paqeruajtës ndërkombëtarë janë ende në Kosovë për të ruajtur paqen me Serbinë, nga e cila Kosova u shkëput në vitin 2008.
/rtsh.al/
