Hëna mund të duket si një shkëmb i ftohtë dhe i pajetë. Por sa e ftohtë bëhet në të vërtetë sipërfaqja e Hënës? Sa është temperatura e saj?
Sipas një studimi në Live Science , në realitet, Hëna nuk është aq e ftohtë, të paktën jo gjatë gjithë kohës. Ashtu si në Tokë, temperatura e sipërfaqes së Hënës ndryshon në varësi të faktit nëse rrezet e diellit e godasin atë. Këto luhatje të temperaturës, megjithatë, mund të jenë mjaft dramatike.
"Temperatura thjesht ndryshon në mënyrë dramatike nga jashtëzakonisht e nxehtë në jashtëzakonisht e ftohtë. Temperatura e Hënës mund të variojë nga rreth - 100 gradë Celsius, në + 100 gradë Celsius." tha John Monier, një profesor i astronomisë në Universitetin e Miçiganit.
Edhe pse Toka dhe Hëna janë afërsisht të njëjtën distancë nga Dielli, rreth 150 milionë kilometra, disa faktorë ndikojnë në arsyen pse temperaturat e tyre janë kaq të ndryshme.
Së pari, Toka ka një atmosferë, e cila bllokon nxehtësinë dhe mban temperatura të tolerueshme në planetin tonë. Hëna nuk ka atmosferë, duke e lënë atë të pambrojtur ndaj nxehtësisë së plotë të Diellit.
Toka gjithashtu ka oqeane të gjera, të cilët thithin dhe ruajnë energjinë nga Dielli dhe e lëshojnë atë vonë natën. Përkundrazi, Hëna shkëmbore piqet ose ngrin në dritë dhe hije. Për më tepër, një cikël hënor ditë-natë përafrohet me një muaj në Tokë, kështu që sipërfaqja e tij është e ekspozuar ndaj dritës dhe errësirës për periudha më të gjata. Kështu, si në dritë ashtu edhe në errësirë, sipërfaqja e Hënës ruan nxehtësinë ose të ftohtin.
Sipas NASA-s, pranë ekuatorit të Hënës, temperaturat mund të arrijnë 121 gradë Celsius në rrezet e diellit dhe të zbresin në minus 133 gradë Celsius në errësirë. Pas Mërkurit, sipërfaqja e Hënës ka mjedisin termik më ekstrem në sistemin diellor.
/rtsh.al/
