RTSH 24 Live

Kulturë

Gërmimet zbulojnë gjetje të reja arkeologjike në kalanë e Bashtovës, i përkasin shekullit të XVIII

03/11/2022

Gërmimet zbulojnë gjetje të reja arkeologjike në kalanë e Bashtovës, i përkasin shekullit të XVIII
Gjetjet në kalanë e Bashtovës

Gërmimet në kalanë e Bashtovës e vendosur në veri të grykëderdhjes së lumit të Shkumbinit kanë zbuluar gjetje të reja arkeologjike që i përkasin periudhës otomane të shekullit të XVIII. Gjetjet përfshijnë disa gjyle të përmasave të ndryshme si dhe materiale qeramike të së njëjtës periudhë.

Zbulimi i tyre u bë gjatë gërmimeve dhe restaurimit të kalasë së Bashtovës në kuadër të programit EU4Culture.

Ministrja e Kulturës, Elva Margariti bëri të ditur se këto gjetje të reja arkeologjike hapin dritare të reja mbi historinë e monumentit.

Në Kalanë e Bashtovës po punohet gjithashtu për identifikimin e shtresave kulturore të monumentit si dhe për kontrollin e çarjeve vertikale në pika të ndryshme të tij.

“Jo vetëm gërmimet e mëtejshme, por edhe dokumentimi dhe studimi i materialeve të gjetura do të na japin përgjigje më të sakta lidhur me këto gjetje”, thotë Margariti.

Gjetjet në kalanë e Bashtovës

Sendet e gjetura në këtë monument ruhen në Muzeun Kombëtar në Tiranë.

Kalaja e Bashtovës është unike në llojin e saj pasi është e vetmja kala në Ballkan e ndërtuar në fushë në fshatin e Vile-Bashtovës. Nga kalaja mund të vëzhgoni bregdetin që nga Gjiri i Durrësit e deri në Divjakë e Karavasta.

Kalaja e Bashtovës ruhen si një monument kulture nga shteti shqiptar.

Gjetjet në kalanë e Bashtovës

/rtsh.al/