Artistja që shihni teksa performon në flaut është Xhejsi Kalziqi, e vetmja grua pjesë e Orkestrës Frymore të Durrësit. Prej 15 vitesh ajo vihet në radhë bashkë me pjesëtarët e tjerë të bandës muzikore në ekzekutimin e marsheve si dhe pjesëve të ndryshme simfonike. Prania e saj bie në sy sidomos në aktivitetet që organizon Bashkia me rastin e festave të ndryshme. E diplomuar në degën e Flautit në Akademinë e Arteve, Xhejsi thotë se ndihet e privilegjuar pranë kolegëve të saj.
“Kam shumë vite në bandën e Durrësit dhe ndjehem shumë mirë edhe kur më shohin në marshet që kemi në qytet”, u shpreh flautistja Xhejsi Kalziqi.
Përveç pjesëmarrjes në Orkestrën Frymore, Xhejsi është njëkohësisht edhe mësuese muzike.
“Jam edhe mësuese në shkollën e muzikës, ky është profesioni që kam dashur dhe që më plotëson”, u shpreh Kalziqi.
Saimir Kalaja, drejtues i orkestrës frymore vlerëson prezencën e flautistes në orkestër, duke shtuar që shpreson se edhe gra të tjera t‘i bashkohen orkestrës.
Së fundmi, Orkestra Frymore e qytetit të Durrësit u vlerësua në Festivalin e Orkestrave i zhvilluar në Shkodër, me çmimin “Pjetër Dungu”.
/RTSH/
