“Ligji i draftuar më herët këtë vit nuk është në nivelet e duhura dhe ka shumë mangësi në disa fusha, si kontrolli i basteve online, monitorimi i platformave dhe menaxhimi i tyre nga shteti, jo nga sektori privat”. Është ky konkluzioni kryesor i deputetëve të maxhorancës për ligjin e lojërave të fatit, të ndryshuar nga qeveria në muajin prill të këtij viti.
Vërejtjet nuk kanë qenë të opozitës, sikundër është logjike. Kanë qenë deputetët e Partisë Socialiste që kanë qëndruar gjatë nëpër nenet e ligjit për të cilësuar atë si “jo në nivelin e sfidës për ta menaxhuar tregun, sipas kryetarit të komisionit botë ekonomisë dhe të financave, Eduard Shalsi.
“Duhet menjëherë të nisë puna që të jetë një ligj më i plotë dhe duhet të bëhen më shumë ndryshime për të formalizuar tregun më mirë”, tha Shalsi.
Por nuk ka qenë ky shqetësimi i vetëm i deputetëve të komisionit. Ligji i ri përcakton edhe procedurat e përzgjedhjes së subjektit fitues, për të cilat deputetët kërkuan që procedura për licensimin për 10 vite të kalojë nëpër dy faza, duke përfshirë kritere pikëzimi dhe investimi.
“Rreziku më i madh vjen nga manipulimi i platformave dhe nga ndërhyrjet në koeficientet e lojërave. Duhet një sistem ku të lihet gjurmë për të gjitha transaksionet e bëra në kompanitë e lojërave të basteve sportive live. Sugjerohet që ky sistem të jetë i monitoruar në kohë reale në një platformë që do të sigurojë mosmanipulimin e tyre. Lojërat e fatit të jenë monopol i shtetit dhe jo i privatit”, tha Erion Braçe.
Qeveria në vitin 2015, pas një aksioni për mbylljen e lojërave të fatit të palicencuara, miratoi një ligj të ri të lojërave të fatit, sipas të cilit biznesi i kumarit do të monitorohej nga një kompani private.
Në shtator të vitit 2016, qeveria miratoi kriteret e përzgjedhjes së operatorit që të do të ndërtojë dhe menaxhojë këtë sistem. Sipas VKM-së, kompania private do të marrë vlerën e investimit nga tarifa që do të paguajnë shoqëritë e licencuara të lojërave të fatit për shfrytëzimin dhe mirë-mbajtjen e sistemit.
Tenderi u hap në dhjetor 2016 dhe kompanitë e interesuara kishin kohë deri më 12 janar për të aplikuar. Gjatë kësaj periudhe asnjë kompani nuk paraqiti oferta, ndaj Ministria e Financave rihapi tenderin sërish në 23 janar 2017.
Në tender morën pjesë dy kompani: konsorciumi “MC Networking” shpk dhe “Admiral Sportwetten “GmbH & ATSI Spolka Akcyjna”, si dhe konsorciumi “Qualysoft” GmbH & “Comtrade” d.o.o & “Starsat International” shpk & “Communication Progress” shpk.
Në mars ministria shpalli fitues bashkimin e kompanive “MC Networking” shpk dhe “Admiral Sportwetten” GmbH & “ATSI Spolka Akcyjna”. Kompania fituese do të menaxhonte për një periudhë 30 vjeçare monitorimin e biznesit të lojërave të fatit.
Ndryshimet e bëra nga qeveria në ligjin ekzistues duket se nuk janë të mjaftueshme për deputetët e maxhorancës që kanë kërkuar jo rishikim të disa neneve të ligjit të vitit 2015, por rishkrimin e plotë të ligjit për lojërat e fatit.
Gazetar: Bardhi Sejdarasi
/rtsh.al/
