RTSH 24 Live

Botë

Biden dhe udhëheqësit e G7-ës mblidhen sot për Lindjen e Mesme

3 orë para

Biden dhe udhëheqësit e G7-ës mblidhen sot për Lindjen e Mesme

Presidenti i SHBA, Joe Biden do të marrë pjesë të mërkurën në një takim telefonik me liderët e G7, për të diskutuar situatën në Lindjen e Mesme. Kjo u bë e ditur nga një burim i njohur me ngjarjen.

Thirrja vjen ndërsa SHBA dhe aleatët po presin se si Izraeli planifikon t'i përgjigjet sulmit raketor të Iranit të martën. Zyrtarët amerikanë kanë thënë se Irani do të përballet me "pasoja të rënda" për sulmin dhe zyrtarët në të gjithë administratën e Bidenit kanë mbetur në kontakte të rregullta me ​​homologët izraelitë, ndërsa ata po përcaktojnë hapat e tyre të ardhshëm

Zyrtarë të lartë nga disa vende të G7, duke përfshirë Francën, Gjermaninë dhe Mbretërinë e Bashkuar, kanë dënuar të gjithë sulmin e Iranit ndaj Izraelit, duke paralajmëruar për pasoja të mundshme katastrofike për rajonin dhe më gjerë. 

Ambasadorja amerikan në OKB e quan sulmin raketor të Iranit ndaj Izraelit një "përshkallëzim të rëndësishëm" të tensioneve në Lindjen e Mesme. Linda Thomas-Greenfield thotë se këshilli duhet të ndërmarrë veprime "të menjëhershme". Ajo i bën thirrje OKB-së që të dënojë Iranin për sulmin dhe të imponojë "pasoja të rënda".

Sulmi i Iranit ndaj Izraelit shton frikën për zgjerimin e konfliktit në Lindjen e Mesme

Sulmi i Iranit ndaj Izraelit me 180 raketa balistike ka shtuar frikën për përshkallëzim në Lindjen e Mesme, ndërsa të dyja vendet lëshuan paralajmërime ndaj njëri-tjetrit. Izraeli është zotuar se do të kundërpërgjigjet, ndërsa Teherani tha se Izraeli duhet të ndalë dhunën në rajon. Ndërkohë ushtria izraelite vazhdoi sulmet në Liban, duke rritur presionin ndaj Hezbollahut.

Irani tha se sulmi me raketa ishte në shenjë hakmarrjeje ndaj fushatës izraelite kundër Hezbollahut në Liban, organizatë aleate e Teheranit.

Ushtria izraelite tha se shumica e raketave u interceptuan dhe shkatërruan në ajër, megjithëse disa ranë në Izraelin qendror dhe jugor dhe dy persona u plagosën lehtë.

Ishte i fundit në një sërë sulmesh të përshkallëzuara në një konflikt shumëvjeçar midis Izraelit dhe Iranit dhe aleatëve të tij arabë.

Kryeministri izraelit, Benjamin Netanyahu tha se sulmi i Iranit dështoi.

“Ai u frenua falë sistemit të mbrojtjes ajrore të Izraelit, i cili është më i avancuari në botë. ..... Falenderoj gjithashtu Shtetet e Bashkuara për mbështetjen e tyre në përpjekjet tona të mbrojtjes”, tha kryeministri izraelit.

Ai u betua se Irani do të paguajë një çmim për sulmin.

“Irani bëri një gabim të madh sot dhe do të paguajë për këtë. Regjimi i Iranit nuk arrin ta kuptojë vendosmërinë tonë për të mbrojtur veten dhe për t'u hakmarrë kundër armiqve tanë.”

Presidenti i Iranit, Masoud Pezeshkian tha të mërkurën se vendi i tij do të përgjigjet edhe më me forcë, nëse Izraeli vazhdon fushatën në Liban.

"Kupola e Hekurt që ata kanë ndërtuar nuk është prej hekuri, është më e brishtë se qelqi. Bota duhet të ndëshkojë një regjim të tillë aparteidi, gjenocidal", tha ai.

Shtetet e Bashkuara, që kishin njoftuar Izraelin për sulmin e pritshëm, gjithashtu e dënuan goditjen e Iranit.

Presidenti Joe Biden tha se administrata e tij është "plotësisht në mbështetje" të Izraelit.

David Aaron Miller, analist i Fondacionit Carnegie për Paqen i tha Zërit të Amerikës të mërkurën se Izraeli do të kundërpërgjigjet dhe se izraelitët janë të vendosur të vazhdojnë përpjekjet për të dobësuar Iranin dhe aleatët e tij në rajon, por ...

“Lindja e Mesme është një rajon shumë i paqendrueshëm dhe nuk duhet të kemi pritshmëri të mëdha që këto arritje ushtarake (të Izraelit) të përkthehen në suksese politike”

Të mërkurën, banorët e Jeruzalemit që kishin dalë për të blerë ushqimet e fundit përpara Vitit të Ri hebre thanë se kishin frikë gjatë sulmit me raketa iraniane të martën në mbrëmje, por i besonin ushtrisë izraelite.

"Kisha frike për fëmijet, nipat e mbesat. Po i telefonoja çdo moment, ishte e frikshme. Por falë zotit, mbetëm të sigurt dhe po luteshim për të gjithë popullin e Izraelit", thotë Sasson Mordehai.

"Për sa kohë që ndoqëm udhëzimet e komandës së ushtrisë që dhe të hynim në dhomën e sigurt, e dija se do ta kalonim", thotë Gila Levitan.

Por në Gazë, Irak, Jordani dhe Jemen banorët i përshëndetën sulmet, duke nxjerrë edhe një herë në pah tensionet e thella rajonale.

Izraeli nuk ka dhënë shenja se do të ndalë veprimet e tij në Liban. Ushtria tha të mërkurën se njësitë e rregullta të këmbësorisë të saj dhe ato të blinduara po i bashkoheshin operacioneve të saj tokësore në vend. Izraeli po e forcon praninë në Libanin jugor, ndërkohë që vazhdon të godasë Hamasin në Gazë.

Këshilli i Sigurimit po diskuton për zhvillimet e fundit. Izraeli i ndaloi Sekratarit të Përgjithshëm Antonio Guterres hyrjen në vend, pasi siç tha Ministri i Jashtëm i vendit, ai nuk dënoi sulmin e Iranit.

/rtsh.al/