Të hënën e 20 janarit, Donald Trump do të betohet si president i 47-të i Shteteve të Bashkuara të Amerikës për t’u rikthyer në Shtëpinë e Bardhë.
Në ceremoninë e betimit pritet të marrin pjesë personalitete nga e gjithë bota. Për këtë arsye, edhe presidentja e Kosovës, Vjosa Osmani ka marrë ftesë nga anëtarë të Kongresit të Shteteve të Bashkuara (Senati dhe Dhoma e Përfaqësuesve), për të qenë e pranishme pjesë në inaugurimin e Presidentit të ri amerikan, Donald Trump .
Megjithatë, duke u bazuar në traditën protokollare, shumica e vendeve përfaqësohen në këto ceremoni nga ambasadorët e tyre të akredituar në Washington D.C.
“Duke e vlerësuar këtë ngjarje si një moment të rëndësishëm në marrëdhëniet në mes Kosovës dhe SHBA-ve, Presidentja ka vendosur ta dërgojë një delegacion të kabinetit të saj, i cili, së bashku me ambasadorin në SHBA, Ilir Dugolli, do ta përfaqësojnë Kosovën në aktivitetet inauguruese të datave 19-21 janar”, tha për RTKlive, Bekim Kupina, këshilltar për Media i presidentes Osmani.
Kuptina tha se presidentja Osmani tashmë ka pasur rastin ta urojë personalisht Presidentin Trump gjatë një bisede të përmbajtësore që zhvilluan muajin e kaluar të mbajtur në Pallatin Elysee, në Paris. “Ky angazhim i vazhdueshëm reflekton përkushtimin e Kosovës për të forcuar bashkëpunimin me administratën e re amerikane dhe për të avancuar interesat e përbashkëta”, tha ai.
/rtsh.al/
