Autoritetet palestineze kanë bërë me dije se 61,709 persona janë vrarë që nga fillimi i luftës mes Izraelit dhe Hamasit më 7 tetor të 2023, ndërsa mijëra të tjerë konsiderohen të zhdukur.
Kreu i Zyrës së Informacionit të Qeverisë së Gazës, Salama Maarouf, në një konferencë për shtyp deklaroi se 76% e trupave të gjetur janë dërguar në qendrat mjekësore, ndërsa dyshohet se mbi 14 mijë persona janë të bllokuar nën rrënoja.
Maarouf theksoi se në mesin e viktimave, 17,881 prej tyre janë fëmijë, përfshirë 214 foshnja të porsalindura.
“Më shumë se 2 milionë njerëz janë zhvendosur me forcë, disa më shumë se 25 herë, në kushte të rënda pa shërbime bazë”, u shpreh ai ndërsa shtoi se të paktën 1,155 personel mjekësor, 205 gazetarë dhe 194 punonjës të mbrojtjes civile raportohet se janë vrarë gjatë sulmeve të Izraelit.
Numrat e përditësuar vijnë në mes të armëpushimit të brishtë midis Izraelit dhe Hamasit. Pauza në luftime, e vendosur të vazhdojë të paktën deri në fillim të marsit, u ka dhënë hapësirë shpëtimtarëve palestinezë për të arritur në pjesë të Gazës që nuk mund të arrinin më parë.
Negociatat janë gati për të nisur për kalimin në fazën e dytë të armëpushimit trefazor. Kjo parashikon një qasje për një fund të përhershëm të luftës.
Ndërmjetësuesit Katari, Egjipti dhe Shtetet e Bashkuara do t'i hapin këto bisedime sot (3 shkurt), por nëse ata nuk mund të sjellin Izraelin dhe Hamasin në një marrëveshje, luftimet mund të rifillojnë në mars.
Kryeministri izraelit Benjamin Netanyahu, i cili ndodhet në Uashington dhe planifikon të takohet me Presidentin Donald Trump, është nën presionin e aleatëve të ekstremit të djathtë për të shkurtuar armëpushimin dhe për të vazhduar luftën.
Netanyahu, i cili së bashku me zyrtarë të tjerë izraelitë dhe liderë të Hamasit kërkohet nga Gjykata Penale Ndërkombëtare për krime të dyshuara lufte, tha se ai dhe Trump do të diskutojnë "fitoren mbi Hamasin, arritjen e lirimit të të gjithë pengjeve tona dhe trajtimin e boshtit të terrorit iranian" në Lindjen e Mesme.
/rtsh.al/
