RTSH 24 Live

Filma

“Open Cinema” nis rrugëtimin në edicionin e pestë dhe në 12 qytete

22/06/2021

“Open Cinema” nis rrugëtimin në edicionin e pestë dhe në 12 qytete

“Open Cinema” pas vështirësive të krijuara nga masat kufizuese të pandemisë në sezonin e katërt, ka nisur rrugëtimin në edicionin e pestë në një situatë më të lirshme. Ky aktivitet ka për qëllim të promovojë regjisorët dhe personat që merren me prodhime kinematografike sidomos në Shqipëri.

Edicioni i pestë i këtij aktiviteti e nisi rrugëtimin  në qytetin e Patosit ku mbrëmjen e 21 qershorit në ambiente të hapura dhe publike janë shfaqur produksionet “Lokomotiva” nga Ermal Qori dhe filmi “Krimineli” i Christian Borovës.

Rrugëtimi do të vazhdojë në 12 qytete të ndryshme të Shqipërisë. Të ftuar në këtë aktivitet do të jenë personalitete të njohur në fusha të ndryshme të artit si  Irma Libohova, Jorgo Papingji, Mevlan Shanaj, Natasha Lako etj.

Ky aktivitet që ka për qëllim promovimin e kinemasë dhe të realizuesve të saj gjithashtu bëhet i mundur me mbështetjen e “Qendrës Kombëtare të Kinematografisë” dhe të bashkive të qyteteve në të cilat do të organizohet. Për të tërhequr vëmendjen e publikut por edhe për t’i argëtuar ata në këto ditë të nxehta vere, të ftuar do të jenë edhe këngëtarë të ndryshëm të muzikës moderne shqiptare.

Skënder Jaçe që është edhe producenti i këtij aktiviteti shprehet se  “strategjia jonë për këtë vit do të fokusohet tek mendimi se kinematografia mbetet një nga artet më popullorë, që përcjell mesazhe të forta për jetën, njerëzimin”.