Numri i abonentëve të rrjetit global televiziv të internetit Netflix është rritur me më shumë se 8 milionë në tremujorin e dytë të këtij viti, transmeton Anadolu.
Netflix ka publikuar bilancin e tremujorit të dytë të këtij viti. Sipas kësaj, të ardhurat e kompanisë u rritën me rreth 17 për qind në tremujorin e dytë të vitit krahasuar me të njëjtën periudhë të vitit të kaluar, duke arritur në 9,6 miliardë dollarë. Të ardhurat e kompanisë në periudhën e njëjtë të vitit të kaluar ishin 8,2 miliardë dollarë.
Fitimi neto i kompanisë arriti në 2,1 miliardë dollarë në tremujorin e dytë, një rritje prej rreth 44 për qind krahasuar me të njëjtën periudhë të vitit të kaluar. Fitimi neto i Netflix-it në tremujorin e dytë të vitit të kaluar ishte 1,5 miliard dollarë.
Edhe fitimet e kompanisë për aksion u rritën, duke shënuar një ngritje nga 3,29 dollarë në 4,88 dollarë.
Numri i abonentëve të Netflix u rrit me 8,05 milionë në tremujorin e dytë të vitit. Numri i abonentëve të kompanisë në mbarë botën u rrit me 16,5 për qind në bazë vjetore, duke arritur në 277,65 milionë.
Duke shpallur parashikimet për tremujorin e tretë të vitit, Netflix njoftoi se pret që të ardhurat e tij të jenë 9,7 miliardë dollarë dhe fitimi neto të jetë afërsisht 2,2 miliardë dollarë.
/ rtsh.al /
