Të paktën 51 persona kanë gjetur vdekjen si pasojë e shpërthimit të zjarrit në një klub nate, në qytetin lindor të Maqedonisë së Veriut, Koçan.
Shumë të tjerë kanë mbetur të plagosur.
Ngjarja ka ndodhur në orët e para të mëngjesit të së dielës.
Zjarri është përhapur nga mjetet piroteknike që janë përdorur gjatë një performance nga bendi maqedonas DNA.
Në kohën e shpërthimit dhe përhapjes së zjarrit, klubi ka qenë i mbushur me njerëz.
Sipas informacioneve nga Ministria e Brendshme e vendit, rreth 1500 persona ishin në ambientet e ngjarjes dhe ndiqnin koncertin.
Kryeministri Mickoski: Qeveria është plotësisht e mobilizuar
Kryeministri maqedonas, Hristijan Mickoski teksa ka shprehur ngushëllimet për jetët e humbura në këtë tragjedi, siguron se Qeveria dhe institucionet do të bëjnë gjithçka që është e mundur për t’i ndihmuar familjet e prekura.
“Me pikëllim të thellë mora lajmin për tragjedinë e tmerrshme në Koçan. Kjo është një ditë e vështirë dhe shumë e trishtueshme për Maqedoninë! Humbja e kaq shumë jetëve të reja është e pariparueshme dhe dhimbja e familjeve, njerëzve të dashur dhe miqve është e pamatshme.
Në këto momente pikëllimi të thellë, mendimet tona janë me ata që kanë humbur të dashurit. Të lënduarve u uroj shërim të shpejtë, ndërsa familjeve të të ndjerit forcë për të përballuar këtë humbje të paimagjinueshme. Populli dhe qeveria do të bëjnë të pamundurën për t'ua lehtësuar sadopak dhimbjen dhe për t'i ndihmuar në këto momente më të vështira.
I bëj thirrje të gjitha institucioneve përkatëse – shërbimeve shëndetësore, policisë, autoriteteve lokale – të ndërmarrin veprime të menjëhershme për të ndihmuar të lënduarit dhe për të mbështetur familjet e prekura. Qeveria është plotësisht e mobilizuar dhe do të bëjë gjithçka që është e nevojshme për të përballuar pasojat dhe për të përcaktuar shkaqet e kësaj tragjedie.
Gjatë ditës, pas shqyrtimit të rrethanave të institucioneve kompetente, do t'i drejtohem publikut me më shumë informacion për hapat e ndërmarrë. Në këto kohë pikëllimi të thellë, kur zemrat tona janë thyer me dhimbje për këtë tragjedi të tmerrshme, unë bëj thirrje për bashkim, bashkim, humanizëm dhe llogari. Zoti qoftë me familjet e viktimave dhe të lënduarve dhe me popullin e Maqedonisë, shprehet kryeministri i Maqedonisë së Veriut.
/rtsh.al/
