Ministri i Shtetit për Marrëdhëniet me Parlamentin, Taulant Balla deklaroi të enjten në Kuvend se procesi i regjistrimit të shqiptarëve që jetojnë e punojnë jashtë vendit do të jetë i hapur për rreth 60 ditë.
Gjatë fjalës së tij, Balla tha se procesi do të hapet 120 ditë para zgjedhjeve dhe do të mbyllet 60 ditë para zgjedhjeve.
“Për herë të parë shqiptarët jashtë kufijve të Shqipërisë do të mund të votojnë nga vendi ku ata jetojnë, punojnë prej vitesh e studiojnë. Dhe kjo u mundësua falë vulosjes së kësaj të drejte në kodin zgjedhor miratuar nga Kuvendi në një votë konsensuale me përjashtim të ndonjë interesi të vogël. Sot jemi në një fazë të rëndësishme të zbatimit të asaj që kemi miratuar më 26 korrik. Të çojmë deri në fund procesin e ushtrimit të të drejtës të zgjedhjes nga ana jo vetëm e qytetarëve shqiptarë që kanë mbushur 18 vjeç dhe që jetojnë në Shqipëri, po dhe shqiptarët që jetojnë jashtë. Shqiptarët në diasporë, në pranverë, në prill apo në maj, se pashë që ishte bërë lajm se unë iu referova datave të kodit zgjedhor. për të shkuar deri te ajo ditë, na duhet që sot në aktin normativ, t’i japim KQZ-së një pjesë të fondeve që i duhen për të ngritur regjistrin. Qeveria do të vazhdojë ta mbështesë përgjatë këtij viti dhe në buxhetin e 2025 me të gjitha aktet e nevojshme. Përfitoj nga ky komunikim publik qytetarëve shqiptarë që jetojnë jashtë territorit, për tu bërë dhe ju pjesë e drejtimit që doni të vijojë Shqipëri, e deputetëve të Kuvendit të Shqipërisë, sepse listat vazhdojnë të jenë të hapura, ajo që na duhet të krijojmë regjistrin, për krijiimin e regjistrit, duhet që KQZ t’i propozojë rregullatorit, rregullatori me një shumicë të cilësuar të përcaktojë procedurën mbi të cilën të ngrihet regjistri. Prandaj ata duhet të regjistrohen, procesi i regjistrimit fillon 120 ditë opara ditës së zgjedhjeve dhe mbyllet 60 ditë para zgjedhjeve. Ata duhet të vetëregjistrohen. Shpresoj që rregullatori i KQZ ta përfundojë sa më shpejt këtë proces, lidhur dhe dokumentacionin, në mënyrë që të realizojmë këtë hap historik. Në fund të kësaj pjesë, ashtu si më 26 korrik një pjesë e opozitës votoi ndryshimet e kodit zgjedhor, nuk e fsheh kërkesën që të votoni dhe sot aktin normativ që mundëson financimin e këtij hapi të rëndësishëm nga autoriteti i ngarkuar me ligj për organizimin e zgjedhjeve. Ftesa ime për opozitën është ta votoni”, tha Balla.
Sipas tij, shqiptarët e diasporës janë dhe do të mbeten ndihmues të mëdhenj të ekonomisë sonë kombëtare.
“Kanë qenë të tillë në këto 33 vite me dërgimin e remitancave, për të investuar në Shqipëri”, tha ai.
Nga ana tjetër, Balla përsëriti ftesën e qeverisë ndaj atyre që janë të gatshëm të investojnë. Përmes këtij akti normativ, theksoi ai, i japim mundësinë Komisionit Qendror të Zgjedhjeve edhe për të ngritur regjistrin.
“Qeveria do të vijojë ta mbështesë përgjatë këtij viti dhe në buxhetin e vitit 2025 me të gjitha fondet e nevojshme për ngritjen e regjistrit”, tha Balla.
“Votimi i Aktit Normativ mundëson financimin e këtij hapi të rëndësishëm nga autoriteti i ngarkuar me ligj për organizimin e zgjedhjeve”, u shpreh Balla, duke shtuar se “për krijimin e regjistrit, KQZ i propozon Rregullatorit dhe më pas ky i fundit me një shumicë të cilësuar përcakton procedurën mbi të cilën të ngrihet regjistri”.
Sipas tij, ata që kanë dëshirë të shprehen me votë të lirë se kush duan të qeverisë, duhet të regjistrohen.
“Ftoj qytetarët shqiptarë jashtë territorit për tu bërë pjesë e përzgjedhjes së drejtimit që doni të vijojë Shqipëria, deputetët që doni në Kuvendin e Shqipërisë, sepse listat do të vijojnë të jenë të hapura.”, deklaroi ai.
/rtsh.al/
