Disa vatra zjarri janë aktive në të gjithë vendin duke shkaktuar dëme të mëdha mjedisore, ndërsa 17 vatra të tjera janë shuar.
Konkretisht zjarri në fushën e mbetjeve në Vlorë vijon të përhapet edhe pse aty janë angazhuar kapacitetet në nivel qarku të mbështetura nga kapacitete të pushtetit qendror.
Prej ditës së djeshme vijon puna nën koordinimin e Agjencisë së Mbrojtjes Civile për shuarjen e zjarrit në fshatin Zogaj të bashkisë Tropojë. 100 Forca të Armatosura u janë bashkuar përpjekjeve të nisura prej dje, të forcave dhe kapaciteteve operacionale të pushtetit vendor të mbështetura nga 3 helikopterët e KFOR bashke me një ekip nga Kosova. Falë këtyre përpjekjeve është bërë e mundur shmangia e rrezikut për banesat e lagjes Hajdarmataj.
Po punohet edhe në një tjetër vatër aktive në fshatin Hoten, Vau Dejës dhe në bashkinë Konispol, fshati Shalës.
Po ashtu puna e forcave operacionale ka bërë që të shmanget kalimi I flakëve drejt banesave në vatrat e zjarrit në fshatin Malecaj dhe fshatin Torovicë, në bashkinë Lezhë, ku janë angazhuar në ndihmë të pushtetit vendor efektivë të FA.
/rtsh.al/