Shtetet e Bashkuara, Izraeli dhe Ukraina po negociojnë transferimin e deri në tetë sistemeve raketore tokë-ajër Patriot në Kiev, raportoi The Financial Times (FT).
Thuhet se sistemet kanë demonstruar aftësinë e tyre për të kapur të gjitha llojet e raketave ruse, duke përfshirë raketat më të reja balistike hipersonike Kinzhal të lëshuara nga ajri.
Raporti, duke cituar pesë burime, tha se bisedimet zhvillohen në nivel zyrtarësh të lartë. Marrëveshja përfundimtare ende nuk është arritur.
Në prill, Izraeli njoftoi synimet e tij për të çaktivizuar tetë sisteme Patriot që thuhet se janë mbi 30 vjeç dhe t'i zëvendësojë ato me modele më të reja. Megjithatë, sistemet në fjalë po përdoren aktualisht në luftën e Izraelit kundër Hamasit, ndërkohë që tensionet me Hezbollahun me bazë në Liban vazhdojnë të intensifikohen.
Që nga pushtimi rus i Ukrainës në shkurt 2022, Kievi ka kërkuar ndihmë ushtarake nga aleatët e tij. Ndryshe nga vendet perëndimore, Izraeli nuk ka ofruar asnjë furnizim.
Zjarrfikësit punojnë për të shuar një zjarr në një ndërtesë apartamentesh pas sulmit rus në Kiev, Ukrainë, 7 shkurt 2024. Autoritetet thonë se Rusia gjuajti raketa dhe drone të tipit Shahed në objektiva anembanë Ukrainës, përfshirë kryeqytetin Kiev. AP Photo/Efrem Lukatsky
Ndërsa Rusia vazhdon presionin në vijën e frontit, pavarësisht ofensivës së dështuar të pranverës, Ukrainës i mungojnë në mënyrë kritike aftësitë e mbrojtjes ajrore.
Sipas tre burimeve të FT , Sekretari amerikan i Shtetit, Antony Blinken diskutoi mundësinë e transferimit të Patriotëve, tani në pronësi të Izraelit, në Ukrainë me Ministrin e Jashtëm të vendit Dmytro Kuleba.
/rtsh.al/
