Presidenti i Shteteve të Bashkuara, Donald Trump, ka deklaruar se Izraeli do t'ia dorëzonte Gazën Shteteve të Bashkuara pasi të mbaronin luftimet dhe popullsia e enklavës tashmë të ishte rivendosur diku tjetër, gjë që sipas tij do të thoshte se nuk do të nevojiteshin trupa amerikane në terren.
Një ditë pas deklaratës së Trump se ai synonte të merrte përsipër dhe të shndërronte Rripin e Gazës në "Rivierën e Lindjes së Mesme", Izraeli urdhëroi ushtrinë e tij të përgatitej për të lejuar "largimin vullnetar" të palestinezëve të Gazës.
Trump, i cili më parë nuk kishte pranuar të përjashtonte vendosjen e trupave amerikane në territorin e vogël bregdetar, sqaroi idenë e tij në komentet në platformën e tij të internetit Truth Social.
"Rripi i Gazës do t'i dorëzohet Shteteve të Bashkuara nga Izraeli në përfundim të luftimeve. Palestinezët do të jenë rivendosur tashmë në komunitete shumë më të sigurta dhe më të bukura, me shtëpi të reja dhe moderne, në rajon. Asnjë ushtar nga SHBA nuk do të ishte i nevojshëm”, tha ai.
Më herët, mes një vale mbështetjeje në Izrael për atë që kryeministri Benjamin Netanyahu e quajti propozimin "e shquar" të Trumpit, ministri i Mbrojtjes Israel Katz tha se kishte urdhëruar ushtrinë të përgatiste një plan për të lejuar banorët e Gazës që dëshironin të largoheshin vullnetarisht nga enklava.
"Përshëndes planin e guximshëm të Presidentit Trump. Banorëve të Gazës duhet t'u lejohet liria për t'u larguar dhe për të emigruar, siç është norma anembanë botës," tha Katz në X. Ai tha se plani i tij do të përfshinte opsionet e daljes nëpërmjet kalimeve tokësore, si dhe rregullime të posaçme për nisjen nga deti dhe ajri./ Reuters
/rtsh.al/
