Presidenti serb Aleksandar Vuçiq ka deklaruar se do të propozojë zyrtarisht Beogradin si vend e mbajtjes së takimit të parashikuar mes Presidentit të zgjedhur të SHBA-së, Donald Trump dhe shefit të Kremlinit, Vladimir Putin.
Gjatë një fjalimi televiziv, Vuçiç deklaroi se Serbia do të ishte e interesuar të organizojë takimin mes liderëve të SHBA-së dhe Rusisë, duke garantuar nivelin e nevojshëm të sigurisë.
“Ky është vendi ku Presidenti Trump ka mbështetjen më të lartë në të gjithë Evropën. Asnjë vend tjetër nuk mund të arrijë nivelin e miratimit të Serbisë për Presidentin Trump... Dhe nga ana tjetër, ky është gjithashtu një vend ku Presidenti Putin është shumë , shumë popullor. Pra, mendoj se ky është vendi në planetin Tokë që u përshtatet shumë të dyve”, është shprehur Vuçiç.
Disa ditë më parë, presidenti i sapozgjedhur i SHBA-së, Donald Trump tha se tashmë po punonte për organizimin e një takimi me Putinin.
Duke komentuar këtë deklaratë, Kremlini vuri në dukje se udhëheqësi rus është "i hapur për kontakte".
Ndërkohë, Ministria e Jashtme e Ukrainës tha se Kievi pret që një takim midis Zelenskyt dhe Trump të zhvillohet menjëherë pas inaugurimit të tij më 20 janar.
/rtsh.al/
