Më 9 janar 2025, me iniciativën dhe nën drejtimin e Guvernatorit të Bankës së Shqipërisë, Gent Sejko, u organizua një takim me sistemin bankar të vendit, ku u diskutuan objektivat dhe prioritetet për forcimin e mëtejshëm të sektorit bankar dhe rritjen e kontributit të tij në zhvillimin e ekonomisë shqiptare. Ky takim shënoi një hap të rëndësishëm drejt avancimit të financimit të projekteve të biznesit dhe mbështetjes për familjet, si dhe zgjerimit të gamës së produkteve dhe shërbimeve financiare për publikun.
Diskutimet u përqendruan gjithashtu në çështje të rëndësishme si nxitja e inovacionit në sektor, aderimi në SEPA (Single Euro Payments Area), dhe zhvillimi i bankingu të hapur. Guvernatori Sejko theksoi rëndësinë e transformimit digjital për sektorin bankar, duke nënvizuar se adoptimi i vazhdueshëm i teknologjive inovative është kyç për përmirësimin e përvojës së klientëve dhe për të përballuar sfidat e sigurisë kibernetike.
Në kuadër të aderimit të Shqipërisë në SEPA, Guvernatori bëri thirrje për angazhim të mëtejshëm të bankave në përgatitjen e infrastrukturës dhe trajnimin e stafit për të përmbushur afatet e vendosura për kryerjen e transaksioneve SEPA brenda vitit 2025. Ky proces do të ndihmojë në rritjen e efikasitetit të pagesave ndërkufitare dhe integrimin e Shqipërisë në sistemin financiar evropian, duke ofruar transaksione më të shpejta dhe me kosto më të ulët për klientët.
Një tjetër temë kyçe ishte kreditimi i ekonomisë, ku Guvernatori theksoi rëndësinë e zgjerimit të këtij sektori për të mbështetur rritjen e konsumit dhe investimeve. Ai veçoi sektorët e nënkredituar, duke përfshirë bizneset e vogla dhe të mesme, si një zonë ku mund të kërkohet një fokus i veçantë. Guvernatori theksoi gjithashtu rëndësinë e menaxhimit të cilësisë së portofolave të kreditimit, për të siguruar stabilitetin dhe shëndetin e sektorit bankar.
Takimi u mbyll me diskutime dhe shkëmbime mendimesh mes të pranishmëve, dhe u vlerësua si një mundësi e rëndësishme për të krijuar një platformë të përbashkët pune për periudhën në vijim, me synim forcimin e mëtejshëm të sektorit bankar dhe mbështetje për zhvillimin ekonomik të Shqipërisë.
/rtsh.al/
