Pasi lirimi i pengjeve u shndërrua në një situatë kaotike në Khan Younis Komiteti Ndërkombëtar i Kryqit të Kuq ka kërkuar që dorëzimi i pengjeve të realizohet në mënyrë të sigurt.
“Ne jemi të lehtësuar që më shumë njerëz janë kthyer në mënyrë të sigurt në shtëpi. Megjithatë, kushtet e sotme nënvizojnë rëndësinë që të gjitha palët të respektojnë marrëveshjet e tyre dhe të sigurojnë që operacionet të zhvillohen në një mënyrë të sigurt dhe dinjitoze. Siguria e këtyre operacioneve duhet të garantohet dhe ne kërkojmë përmirësime në të ardhmen”, u shpreh presidentja e KNKK Mirjana Spoljaric.
Gjatë transferimit, mijëra palestinezë të zemëruar sulmuan furgonët që mbanin pengjet, duke e kthyer në një situatë katoike për automjetet e Kryqit të Kuq dhe duke i vendosur në një situatë të vështirë pengjet Arbel Yehoud dhe Gadi Mozes, si dhe pesë shtetas tajlandezë të rrëmbyer më 7 tetor 2023.
Izraeli u përgjigj duke vonuar lirimin e 110 të burgosurve palestinezë për disa orë derisa të garantonte që skena të tilla nuk do të përsëriteshin.
Në përputhje me pozicionin e neutralitetit të agjencisë, KNKK nuk fajëson asnjë palë për situatën.
“Përpara çdo transferimi, KNKK u thekson palëve rëndësinë e garantimit të sigurisë së të gjithë personave të përfshirë, veçanërisht atyre që lirohen. KNKK nuk kontrollon kohën e lëshimit, vendin apo mjedisin përreth. Detajet dhe logjistika përcaktohen nga vetë palët”, thotë organizata.
/rtsh.al/
