Mbi 600 persona preken çdo vit nga diabeti në Elbasan. Mjekët vërejnë se, kjo sëmundje po përhapet me ritme të shpejta, duke u bërë rrezik serioz.
Shqetësues sipas mjekëve është fakti se një pjesë e atyre që janë me diabet nuk e dinë, dhe kjo e bën të vështirë si kurimin ashtu dhe parandalimin. Ndër shkaqet që diabeti po rritet ne mënyrë të frikshme është jeta sedentare dhe mungesa e aktivitetit fizik.
Mjeku endokrinolog, Shefqet Deliallisi tregon se kjo sëmundje ka marrë përmasa pandemike ndërsa këshillon se një qytetar mbi 45 vjeç duhet të masë nivelin e sheqerit në gjak, e cila është një analizë e thjeshtë që e zbulon.
“Ka ndryshuar stili i jetësës, ka ndryshuar edhe mënyra e të ushqyerit, është shtuar dhjamosja dhe obeziteti. Njerëzit bëjnë më pak aktivitet fizik. Edhe personat që janë nën 45 -vjeç, njëherë në tre vjet duhet të masin nivelin e sheqerit sidomos kur kanë në familje një person me diabet, kanë tensionin e lartë, yndyrnat e larta, gratë që kanë lind fëmijë mbipeshë, të gjitha këto duhet ta bëjnë një analizë”, tha mjeku.
Shqetësim mbeten fëmije te prekur me diabet me tipin 1, ku rastet e tyre variojnë në 4-5 raste në vit.
/rtsh.al/
